Akshay Kelkar Post : सध्या महाराष्ट्रात मराठी भाषा सक्तीची असण्यावरुन बराच वाद सुरु असलेला पाहायला मिळतो. मराठी भाषा आपल्या महाराष्ट्रात बोलली गेली पाहिजे असं प्रत्येकाचं म्हणणं आहे. कामाच्या ठिकाणी, वा बाहेरच्या राज्यातून आलेल्यांनी मराठी भाषा बोलली आहे असं नाही आहे. पण त्यांनी तसा माजही दाखवू नये असं अनेकांचं म्हणणं आहे. महाराष्ट्रात मराठी भाषेच्या समर्थनार्थ आता मराठी कलाकारही सोशल मीडियावर व्यक्त होताना दिसले. आता ‘बिग बॉस मराठी’ फेम अक्षय केळकरही मराठी भाषेबाबत बोलताना दिसला. थेट सोशल मीडियावर पोस्ट शेअर करत त्याने मराठी भाषा बोलण्यावरुन आपलं मत मांडलं आहे.
अक्षयने सोशल मिडियावर पोस्ट शेअर करत, “माझ्या आजुबाजूला आणि माझ्या व्यवसायात असे माझे अनेक मित्र -मैत्रिणी आणि परिचित लोक आहेत, जे जन्माने अमराठी आहेत. केवळ चार ते पाच वर्षांपासून ते महाराष्ट्रात आणि मुंबईत वास्तव्य करत आहेत परंतु ते खूप छान मराठी बोलतात. त्याचबरोबर अशीही काही माणसे आहेत, ज्यांना बरीच वर्ष इथे राहूनही संपूर्ण शुद्ध मराठी शिकायला जमत नाही, तरीही तोडकी मोडकी का असेना, पण मराठीत बोलायचा प्रयत्न करतात. जेव्हा आपल्याला एखाद्या गोष्टीबद्दल आदर असतो, तेव्हा तो आपल्या कृतीतून, प्रयत्नांतून स्पष्ट दिसत असतो”.
पुढे त्याने म्हटलं, “तुम्ही ज्या राज्यात वास्तव्याला आहात, त्या राज्याची भाषा तुम्हाला बोलता येणं ही अपेक्षा खरंच इतकी मोठी आहे? तुम्हाला शुद्ध मराठीची कोणतीही परीक्षा द्यायची नाही, तर फक्त गरजेपुरते मराठी बोलता येईल इतकीच अपेक्षा आहे. प्रत्येक राज्य जर तिथे बोलल्या जाणाऱ्या भाषेच्या आधारेच ठरविण्यात आलं आहे, तर त्या-त्या राज्यात ती-ती भाषा बोलली जावी ही अपेक्षा चूक कशी काय असू शकते?. तरीही, कोणत्याही कारणामुळे, जर इथली भाषा बोलता येत नसेल, तर किमान सौजन्यपूर्वक ही बाब मान्य करुन, मुजोरी न दाखवता ही संवाद साधता येऊ शकतो”.
आणखी वाचा – “कार्तिक आर्यनाचाही सुशांत सिंह राजपूत होणार”, बॉलिवूडच्या सुप्रसिद्ध गायकाचा धक्कादायक दावा, काळं सत्य समोर
अखेरीस अक्षयने, “इथे प्रत्येकजण आपापल्या परीने कमवत आहे, कमवायलाच आलेला आहे. प्रत्येकजण कष्ट करुन आपापल्या पद्धतीने जगतो आहे. तेव्हा, स्वतःच्याच जगण्यासाठी मिळवलेल्या उत्पन्नाचा आणि जमवलेल्या संपत्तीचा हा कोणता माज?. जरी तुमचा जन्म इथे झाला नसला तरी, आपल्या कर्मभूमी बद्दल किमान आदर तरी असावा”, असं त्याने म्हटलं आहे. अक्षयची ही पोस्ट अनेकांच्या पसंतीस पडली आहे.
