‘महाराष्ट्र भूषण पुरस्कार २०२३’चे यंदाचे मानकरी ज्येष्ठ अभिनेते अशोक सराफ ठरले. अफाट लोकप्रियता लाभलेले चतुरस्त्र अभिनेते अशोक सराफ उर्फ अशोक मामा यांना ‘महाराष्ट्र भूषण’ पुरस्कार देऊन सन्मानित करण्यात आले. आजवर अनेक चित्रपट, मालिका व नाटक या क्षेत्रातून विविधांगी भूमिका साकारत अशोक सराफ यांनी प्रेक्षकांच्या मनावर राज्य केलं. आणि त्यांच्या या कामाची पोचपावती म्हणून त्यांना या महत्त्वाच्या पुरस्काराने सन्मानित करण्यात आलं आहे. (Ashok Saraf Maharashtra Bhushan Purskar)
कला क्षेत्रातील भरीव योगदानासाठी २०२३ या वर्षाचा मानाचा ‘महाराष्ट्र भूषण’ पुरस्कार अशोक सराफ यांना देण्याची घोषणा मुख्यमंत्री एकनाथ शिंदे यांनी केली आहे. दरम्यान या आंनदी सोहळ्याचं जंगी सेलिब्रेशन अशोक सराफ यांच्या राहत्या घरी करण्यात आलं. ‘महाराष्ट्र भूषण’ पुरस्कार मिळाल्यानंतर ‘इट्स मज्जा’ने नुकतीच अशोक सराफ यांची भेट घेतली.
यावेळी त्यांच्या राहत्या घरी या पुरस्कार सोहळ्याचा हा खास क्षण साजरा केला. अशोक सराफ यांच्या पत्नी अभिनेत्री निवेदिता सराफ यांनी अशोक सराफ यांना ओवाळत त्यांचे आशीर्वाद घेतले. याशिवाय अशोक सराफ यांची मोठी बहीणही याप्रसंगी उपस्थित होती. मोठ्या बहिणीनेही भाऊरायाची ओवाळणी केली. त्यानंतर अशोक सराफ व निवेदिता सराफ या दोघांनी त्यांच्या मोठ्या बहिणीचे आशीर्वाद घेतले. सराफ कुटुंबीयांचा आनंद गगनात मावेनासा झालेला यावेळी पाहायला मिळाला.
यंदाच्या ‘महाराष्ट्र भूषण’ पुरस्काराचे मानकरी अशोक सराफ ठरताच अनेक स्तरातून त्यांच्यावर शुभेच्छांचा वर्षाव होताना पाहायला मिळत आहे. अनेक कलाकार मंडळी व राजकीय नेते मंडळींनीही अशोक सराफ यांचं भरभरून कौतुक केलं आहे.