Majjacha Adda with Ashok Saraf : मराठी चित्रपटससृष्टीमधील ८०-९० च्या दशकातला काळ हा अशोक सराफ, सचिन पिळगावकर, महेश कोठारे व लक्ष्मीकांत बेर्डे यांनी चांगलाच गाजवला. या कलाकारांनी मराठी चित्रपटसृष्टीला एक वेगळीच ओळख दिली. त्यापैकी लक्ष्मीकांत बेर्डे आज आपल्यामध्ये नाहीत. पण अशोक सराफ, सचिन पिळगावकर, महेश कोठारे हे आजही त्यांच्या आठवणीत भावुक होतात. त्यांच्याबद्दलच्या अनेक आठवणी सांगतात. अशातच अशोक सराफ यांना ‘मज्जाचा अड्डा’ या कार्यक्रमात लक्ष्मीकांत यांच्याबरोबरच्या नात्याबद्दल प्रश्न विचारण्यात आला. तेव्हा त्यांनी त्यांनी लक्ष्मीकांत यांच्याबरोबरच्या आठवणींना उजाळा दिला.
यावर उत्तर देताना अशोक सराफ यांनी असे म्हटले की, “लक्ष्मीकांत हा खूपच मेहनती व टॅलेंटेड कलाकार होता. त्याने अगदी शून्यापासून सुरुवात केली आणि त्याच्या मेहनतीच्या जोरावर तो चित्रपटसृष्टीमध्ये आघाडीचा कलाकार झाला. कुठल्याही कलाकाराने शून्यापसून सुरुवात करत आपले वेगळे विश्व निर्माण करणे हे खुप कठीण असते. हे सगळ्यांनाच जमत नाही. पण त्याने ते करुन दाखवलं. त्याने स्वत:वर खूप मेहनत घेतली आणि त्यावर तो कुठल्याकुठे निघून गेला. आम्ही दोघांनी मिळून जवळपास ५० चित्रपटांमध्ये एकत्रित काम केले. मी लोकप्रियतेच्या शिखरावर तो या क्षेत्रात आला. त्यामुळे मी त्याला सीनियर होतो आणि म्हणून त्याला माझ्याबद्दल एक आदरयुक्त भीती होती. त्यामुळे मला तो कायम घाबरून राहायचा.”
यापुढे त्यांनी लक्ष्मीकांत यांचे कौतुक करताना असे म्हटले की, “लक्ष्मीकांत हा खूप खट्याळ व मिश्किल होता. तो बाहेर खूप धमाल मज्जा मस्ती करत असला, तरी माझ्याबरोबर असताना तो नेहमीच शांत असायचा. इतरवेळी तो काहीही करत असला तरी माझ्यासमोर तो कधीही वाकडंतिकडं बोलायचा नाही किंवा काही फालतूगिरी करायचा नाही. मला कायम घाबरून राहायचा. पण हा त्याच्या स्वभावातला चांगुलपणा होता. माझ्याविषयीच्या आदरयुक्त भीतीमुळे तो माझ्यासमोर जास्त बोलायचा नाही. तसेच त्याची आकलनशक्ती ही फार चांगली होती. तो नाचण्यात खूप चांगला होता. तो डान्समधील स्टेप्स खूप चांगल्या प्रकारे करायचा. माझ्याबरोबर त्याने कायम सहाय्यक भूमिका केल्या. पण त्यानंतर त्याने वैयक्तिक व मुख्य भूमिका असलेले अनेक चित्रपट केले आणि तो सुपरस्टार झाला.”
दरम्यान, यावेळी त्यांनी लक्ष्मीकांत यांचे तोंडभरून कौतुक केले. लक्ष्मीकांत यांच्या स्वभावाबद्दल सांगितले. यांसह ‘मज्जाचा अड्डा’ या कार्यक्रमात त्यांनी इतर विषयांवरदेखील मनमोकळेपणाने संवाद साधला. अनेक विषयांना त्यांच्या खास शैलीत उत्तरे देत ‘मज्जाचा अड्डा’ या कार्यक्रमात गप्पा मारल्या. त्याचबरोबर अनेक प्रश्नांवर त्यांनी त्यांची दुसरी बाजुही मांडली व अड्डा श्रवणीय केला.
