किरण राव दिग्दर्शित ‘लापता लेडीज’ या चित्रपटाला प्रेक्षकांसह समीक्षकांकडून चांगलाच प्रतिसाद मिळाला. १ मार्च रोजी चित्रपटगृहांत प्रदर्शित झालेल्या या चित्रपटाने बॉक्स ऑफिसवर बऱ्यापैकी कमाई केली होती. ‘लापता लेडीज’ चित्रपटाच्या माध्यमातून दिग्दर्शिका किरण रावने रुपेरी पडद्यावर पुनरागमन केले. अशातच आता हा चित्रपट ओटीटीवर प्रदर्शित होण्यासाठी सज्ज झाला आहे. जाणून घ्या, ‘लापता लेडीज’ हा चित्रपट कोणत्या ओटीटी माध्यमावर प्रदर्शित होणार आहे.
नेटफ्लिक्स या ओटीटी माध्यमावर हा चित्रपट प्रदर्शित होणार असून नुकतंच याचे पोस्टर प्रदर्शित करण्यात आले आहे. ‘लापता लेडीज’ चित्रपट आता ओटीटीवर शुक्रवारपासून रिलीज होणार असल्याचे ‘नेटफ्लिक्स’ने जाहीर केले आहे. २६ एप्रिल म्हणजेच आजपासून हा चित्रपट ऑनलाइन प्रदर्शित होणार असल्याचे नेटफ्लिक्सने सांगितले. त्यामुळे ज्यांना हा चित्रपट चित्रपटगृहांमध्ये पाहता आला नाही आणि ज्यांना पुन्हा पाहायचा आहे, अशा दोन्ही प्रेक्षकांना ‘लापता लेडीज’ ओटीटीवर पाहता येणार आहे.
‘लापता लेडीज’ ही दोन महिलांची गोष्ट आहे. नवीनच लग्न झालेला दीपक आपल्या बायकोला घेऊन त्याच्या गावी जातो. पण घरात नवरीचा पदर उचलला की, सगळ्यांचेच डोळे उघडे राहतात. फूल कुमारीशी लग्न करायला गेलेला दीपक पुष्पाला घरी घेऊन येतो. फुल कुमारी कुठे आहे आणि पुष्पा कोण आहे याचे रहस्य चित्रपटाच्या अखेरीस उलगडते. अशी या चित्रपटाची कथा असून या चित्रपटाद्वारे सामाजिक संदेशही देण्यात आला आहे.
या चित्रपटाची निर्मिती आमीर खानसह किरण राव आणि ज्योती देशपांडे यांनी केली आहे. चित्रपटात नितांशी गोयल, प्रतिभा रंता, स्पर्श श्रीवास्तव यांच्या प्रमुख भूमिका आहेत. छाया कदम यांनीदेखील या चित्रपटात आपली छाप सोडली आहे. तसेच रवी किशनही या चित्रपटात महत्त्वाच्या भूमिकेत आहे. जवळपास ५० दिवस हा चित्रपट मोठ्या पडद्यावर सुरू होता. यानंतर आता हा चित्रपट ओटीटीवरही पाहण्यासाठी सज्ज झाला आहे.
