झी मराठी वहिनीवरील लोकप्रिय मालिका ‘सातव्या मुलीची सातवी मुलगी’ मधून प्रेक्षकांची मनं जिंकणारी प्रसिद्ध अभिनेत्री तितिक्षा तावडे ही नुकतीच विवाहबंधनात अडकली. २६ फेब्रुवारी रोजी तितीक्षाने अभिनेता सिद्धार्थ बोडकेबरोबर लग्नगाठ बांधली. या विवाहाला मराठी मनोरंजन विश्वातील अनेक कलाकारांनी हजेरी लावली होती. तिच्या लग्नाचे अनेक फोटो व व्हिडीओ सोशल मीडियावर व्हायरल झाले होते. यावेळी तितीक्षा-सिद्धार्थ यांच्या लग्नातील खास लूकचीही बरीच चर्चा रंगली होती.
आपल्या बहिणीच्या लग्नात अभिनेत्री खुशबू तावडे करवलीप्रमाणे मिरवली होती. मोठी बहीण असून खुशबूने तितीक्षाच्या लग्नात आईप्रमाणे जबाबदारी घेतली असल्याचे पाहायला मिळालं. अशातच आज आज तितीक्षा-सिद्धार्थ यांच्या लग्नाला दोन महिने पूर्ण झाले आहेत. बहिणीच्या लग्नाला दोन महीने पूर्ण झाल्यामुळे खुशबूने दोघांना खास शुभेच्छा दिल्या आहेत. खुशबूने तिच्या इन्स्टाग्राम अकाउंटद्वारे एक व्हिडीओ शेअर केला आहे. या व्हिडीओमध्ये ती तितीक्षाच्या डोक्याला मुंडावळ्या बांधताना दिसत आहे. तसंच या व्हिडीओमध्ये दोघी बहिणींचा खास बॉण्डदेखील दिसून येत आहे.
“काही जण आपल्या मौल्यवान व आनंदी क्षणांमध्ये कायमच डोकावत असतात. तशी मी तुझ्या पाठीशी नेहमीच असेन. नेहमी आणि कायम. लग्नाला दोन महीने पूर्ण झाल्याच्या निमित्ताने तितीक्षा व सिद्धार्थ तुम्हा दोघांना खास शुभेच्छा” असं म्हणत खुशबूने हा व्हिडीओ शेअर केला आहे. या व्हिडीओमध्ये दोघीही साडीमध्ये अतिशय सुंदर दिसत असून खुशबुने गडद गुलाबी रंगाची साडी परिधान केली आहे, तर तितीक्षाने पेस्टल रंगाची साडी परिधान केली आहे.
खुशबू-तितीक्षा या मनोरंजन सृष्टीतील सध्याच्या आघाडीच्या अभिनेत्री असून त्या दोघी उत्तम बहिणीदेखील आहे. त्यामुळे या दोघींचा खास बॉण्ड नेहमीच पाहायला मिळाला आहे. दरम्यान, खुशबू झी मराठी वाहिनीवरील ‘सारं काही तिच्यासाठी’ या मालिकेमध्ये मुख्य भूमिका साकारत आहे. तर, बहिण तितीक्षा ‘सातव्या मुलीची सातवी मुलगी’ या मालिकेमध्ये नायिकेच्या भूमिकेत पाहायला मिळत आहे.
