बऱ्याच दिवसांपासून कलाविश्वात एकामागोमाग एक कलाकार मंडळी लग्नबंधनात अडकत आहेत. अशातच गोविंदाची भाची व कृष्णा अभिषेकची बहीण आरती सिंहच्या लग्नाची बरेच दिवसांपासून चर्चा सुरु होती. अखेर आरती सिंह लग्नबंधनात अडकली आहे. मुंबईतील जुहू येथील इस्कॉन मंदिरात आरती सिंह व दीपक चौहान यांनी लग्नगाठ बांधली. अगदी शाही थाटामाटात दोघांचा लग्नसोहळा पार पडला. आरतीचा भाऊ कृष्णा अभिषेकसह अनेक सेलिब्रिटींनी या लग्नाला हजेरी लावली होती. (Aarti Singh And Dipak Chauhan Wedding)
बहिणीच्या लग्नात कृष्णा अभिषेकच्या खास लूकची विशेष चर्चा रंगली. पत्नी कश्मिराबरोबर तो पांढऱ्या रंगांच्या मॅचिंग कपड्यांमध्ये दिसला. बहिणीच्या लग्नात तो खूपच भावुकही झालेला पाहायला मिळाला. त्यांची दोन्ही मुलंही मॅचिंग शेरवानीमध्ये पापाराझींना फोटो देताना दिसली. आरती व दीपक एका नवविवाहित जोडप्याच्या रुपात पहिल्यांदाच मीडियासमोर आले आणि रिसेप्शनच्या बाहेर उभ्या असलेल्या पापाराझींना पोज दिली. यावेळी पोझ देताना आरतीने तिच्या पतीच्या खांद्यावर हात ठेवला. त्यानंतर आरतीने पापाराझींचे हात जोडून स्वागत केले आणि तिच्या लग्नाच्या या सोहळ्याचा भाग झाल्याने त्यांचे आभार मानले.
कमीतकमी मेकअपसह लाल रंगाच्या वधूच्या लेहेंग्यात आरती खूपच सुंदर दिसत होती. तर नवरा मुलगाही पांढऱ्या रंगाच्या शेरवानीमध्ये उठून दिसत होता. आरतीचा लेहेंगा पाहून नेटकरीही खूप प्रभावित झाले आणि त्यांनी तिची खूप प्रशंसा केली. आरती व दीपक यांच्या लग्नाची सोशल मीडियावर चांगलीच चर्चा रंगली. या नववधूवराच्या हटके लूकने साऱ्यांच्या मनात घर केलं.
आरती व दीपक यांनी काल रात्री एका भव्य संगीत सोहळ्याचे आयोजन केले होते आणि त्यात अंकिता लोखंडे आणि तिचा पती विकी जैन, माहिरा शर्मा, युविका चौधरी, भारती सिंग यांच्यासह अनेक टीव्ही सेलिब्रिटी उपस्थित होते. या कार्यक्रमाचे बरेच व्हिडीओ सोशल मीडियावर समोर आले आहेत आणि चाहते आरतीच्या लग्नातील व्हिडीओला भरभरून प्रतिसाद देत आहेत. पापाराझींनी शेअर केलेल्या इंस्टाग्रामवरील पोस्टमध्ये आरती दीपकसह केक कापताना दिसली.