टीव्ही विश्वातील लोकप्रिय अभिनेत्री आरती सिंहचे लग्न बरेच दिवसांपासून चर्चेत राहिले. आरतीच्या लग्नाचे अनेक व्हिडीओ व फोटो सोशल मीडियावर तुफान व्हायरल होत आहेत. आरतीच्या लग्नाची चर्चा आणखी एका गोष्टीमुळे रंगली ती म्हणजे तिचा मामा गोविंदा भाचीला लग्नाला हजेरी लावणार की नाही यामुळे. मात्र अखेर नववधूला आशीर्वाद देण्यासाठी बॉलिवूडचा सुपरस्टार व आरती सिंहचा मामा गोविंदा लग्नात पोहोचला. आरतीने पेशाने व्यावसायिक असणाऱ्या दीपक चौहानशी लग्नगाठ बांधली. दोघांच्या लग्नाची सोशल मीडियावर जोरदार चर्चा सुरु आहे. (Govinda At Aarti singh Wedding)
जुहू येथील इस्कॉन मंदिरात या दोघांचा शाही विवाहसोहळा पार पडला. भाचीच्या लग्नात त्याने स्टायलिश एन्ट्री घेतलेली पाहायला मिळाली. काळ्या रंगाचा जोधपुरी ड्रेस परिधान करुन हिरो नंबर १ ने लग्नात शानदार एन्ट्री केली. आरतीच्या लग्नाला अनेक कलाकारांनी हजेरी लावलेली पाहायला मिळाली. लग्नासाठी करण सिंग ग्रोव्हर व बिपाशा बसूही आले होते.
आरतीच्या लग्नादरम्यान गोविंदानेही मीडियाशी थोडासा संवाद साधला. भाचीच्या लग्नात गोविंदा एकटाच पोहोचला होता आणि त्याची पत्नी सुनीता आहुजा आणि मुले यशवर्धन व टीना हे उपस्थित नव्हते. यावेळी इन्स्टंट बॉलिवूडशी बोलताना गोविंदा म्हणाला, “मी देवाकडे प्रार्थना करतो की, आरतीला अनेकानेक आशीर्वाद. तिला कोणत्याही प्रकारचा वास्तुदोष होऊ नये”. आरतीच्या लग्नात सिनेतारे-तारकांनी जल्लोष केला. इंडस्ट्रीतील बड्या व्यक्तींनी हजेरी लावली होती. गोविंदा त्याच्या व कृष्णाच्या कुटुंबातील वैर बाजूला ठेवून आरती व दीपकच्या लग्नाला उपस्थित राहिला आणि दोघांना आशीर्वादही दिला.
कमीतकमी मेकअपसह लाल रंगाच्या वधूच्या लेहेंग्यात आरती खूपच सुंदर दिसत होती. तर नवरा मुलगाही पांढऱ्या रंगाच्या शेरवानीमध्ये उठून दिसत होता. आरतीचा लेहेंगा पाहून नेटकरीही खूप प्रभावित झाले आणि त्यांनी तिची खूप प्रशंसा केली. आरती व दीपक यांच्या लग्नाची सोशल मीडियावर चांगलीच चर्चा रंगली. आरतीचा नवरा दीपक चौहान लग्नाच्या मिरवणुकीत वधूला घेऊन जाण्यासाठी नाचत आलेलाही दिसला. आरती व दीपकला शुभेच्छा देण्यासाठी अरबाज खान, शहजादा धामी, युविका चौधरी, रश्मी देसाई, देवोलिना भट्टाचार्जी यांच्यासह अनेकांनी लग्नाला हजेरी लावली होती.