बालपणात किंवा कळत्या वयात विविध प्रसंग घडतात जे कायमस्वरुपी स्मरणात राहतात. अनेकदा काही वाईट प्रसंगांना सामोरं जावं लागतं. त्या काळामध्ये वाटणारी भीती कायमच मनात पेरली जाते. असंच काहीसं सुप्रसिद्ध अभिनेते जॉनी लिव्हर यांची मुलगी जेमीच्या बाबतीत घडलं आहे. सार्वजनिक ठिकाणी वावरत असताना बऱ्याच स्त्रियांना अनेकदा विचित्र प्रसंगांचा सामना करावा लागतो. चुकीच्या ठिकाणी घाणेरडा स्पर्श असो वा घाणेरडी नजर हे वाईट अनुभव स्त्रियांना काही नवे नाहीत. जेमीलाही हा प्रसंगांना तोंड द्यावं लागलं. त्याची छाप अजूनही तिच्या मनावर आहे. नुकतंच तिने याबाबत उघडपणे भाष्य केलं. (jamie lever revealed horrible experience)
जेमीने नुकतीच हॉटरफ्लायला मुलाखत दिली. यावेळी तिने वाईट प्रसंगांबाबत सांगितलं. ती म्हणाली, “त्यावेळी मी मुंबईतील विलेपार्ले परिसरातील जमनाबाई नरसी इंटरनॅशल शाळेमध्ये शिकत होते. माझ्या ड्रायव्हरने शाळा सुटल्यानंतर कारमध्ये बसायला सांगितलं. मी माझ्या मित्र-मैत्रिणींबरोबर कारच्या पाठच्या सीटवर बसले होते. आम्ही माझ्या भावाची वाट बघत होतो. एक माणूस आला आणि आमच्या गाडीच्या बाहेर तो उभा होता. त्याने पँटची चैन खोलली आणि हस्तमैथून करु लागला”.
“मी खूपच घाबरले होते. तो नक्की काय करत आहे? हे मला कळत नव्हतं. मी थरथर कापू लागले. कारण मला वाटत होतं की, तो आता गाडीचा दरवाजा उडणार की काय?. मी हळूच दरवाजा पूर्ण बंद केला. आम्ही त्याच्याकडे बघत नाही हे त्याला कळाल्यावर तो तिथून निघून गेला. पण मी हा प्रकार माझ्या आई-वडिलांनाही सांगितला नाही. कारण तेव्हा मला खूपच धक्का बसला होता”.
पुढे जेमीने आणखी एक घटना सांगितली. ती म्हणाली, “एकदा अंधेरी स्टेशनला मी पायऱ्या उतरत होते. एक माणूस माझ्या समोर आला. त्याने घाणेरडं कृत्य करण्यास सुरुवात केली. माझ्या मित्राने मला खेचलं आणि पुढे चालत राहा म्हणून सांगितलं. या सगळ्या गोष्टी तुम्हाला खूप त्रास देतात. आता मला असं वाटतं की, स्वतःसाठी प्रतिकार करण्याची ताकद आता माझ्याकडे आहे”. जेमीने सांगितलेले प्रसंग खरंच खूपच धक्कादायक होते.
