“हसताय ना मंडळी? हसायलाच पाहिजे” असं म्हणत प्रेक्षकांना पोट धरून हसायला भाग पाडणारा अभिनेता, लेखक व दिग्दर्शक डॉ. निलेश साबळेने ‘चला हवा येऊ द्या’ या लोकप्रिय शोच्या माध्यमातून प्रेक्षकांचे भरभरून मनोरंजन केले. ‘चला हवा येऊ द्या’ या शोने गेली १० वर्षे जगभरातल्या प्रेक्षकांना खळखळून हसवल्यानंतर नुकताच या शोने प्रेक्षकांचा निरोप घेतला. ‘झी मराठी’वरील ‘चला हवा येऊ द्या’ या कॉमेडी शोमधून एक्झिट घेतल्यानंतर निलेश आता “हसताय ना? हसायलाच पाहिजे” हा नवा शो घेऊन येत आहे.
गेले काही दिवस या शोचे अनेक प्रोमो सोशल मीडियावर पाहायला मिळत होते. तेव्हापासूनच या नवीन शोची उत्सुकता लागून राहिली होती. अशातच आता या शोचा आणखी एक प्रोमो समोर आला असून् या प्रोमोमध्ये शोच्या पहिल्या प्रहसनाची (स्किट) झलक पाहायला मिळत आहे. या नवीन प्रोमोमध्ये ओंकार भोजने व भाऊ कदम यांचे प्रहसन चालू असल्याचे पाहायला मिळत असून त्यांच्या विनोदावर ‘बाईपण भारी देवा” चित्रपटाची संपूर्ण टीम पोट धरून हसतानाचे दिसत आहे.
त्याचबरोबर या प्रोमोमध्ये अभिनेते भरत जाधव व अलका कुबल यादेखील ओंकार व भाऊ या जोडगोळीच्या विनोदावर हसत आहेत. या स्किटमध्ये ओंकार व भाऊ हे दोघेही स्त्रीपात्र साकारत असून त्यांच्या विनोदांनी प्रेक्षकांनादेखील हसायला भाग पाडले आहे. त्यामुळे ‘हसताय ना? हसायलाच पाहिजे’च्या या नवीन प्रोमोला चाहत्यांनीही लाईक्स व कमेंट्स करत चांगलाच प्रतिसाद दिला आहे.
‘हसताय ना? हसायलाच पाहिजे?’ या शोचे लेखन, दिग्दर्शन, सूत्रसंचालन अशी संपूर्ण धुरा डॉ. निलेश साबळे स्वतः सांभाळणार आहे. तर भाऊ कदम, ओंकार भोजनेबरोबरच सुपर्णा श्याम, स्नेहल शिदम व रोहित चव्हाण आदी कलाकारांचा समावेश आहे. येत्या २७ तारखेपासून शनिवार-रविवार रात्री नऊ वाजता हा कार्यक्रम पाहायला मिळणार आहे.
