मराठीतील सुप्रसिद्ध अभिनेते अशोक सराफ यांना पद्मश्री पुरस्कार देऊन सन्मानित करण्यात आलं. राष्ट्रपती द्रौपती मुर्मू यांच्या हस्ते हा पुरस्कार त्यांना देण्यात आला. तो क्षण अशोक मामांसह त्यांची पत्नी निवेदिता सराफ, संपूर्ण कुटुंबिय आणि मराठी इंडस्ट्रीसाठी अभिमानाचा क्षण होता. आयुष्यातील मोठं स्वप्न पूर्ण झालं असल्याच्या भावना यावेळी अशोक यांनी व्यक्त केल्या. कलाक्षेत्रात केलेल्या उल्लेखनीय कामगिरीबद्दल अशोक यांना त्यांच्या कामाची सुंदर पोचपावती मिळाली. या सोहळ्याला अशोक यांच्यासह निवेदिताही होत्या. त्या परदेशात होत्या. मात्र नवऱ्याचा सन्मान आणि सोनेरी क्षण तिथे उपस्थित राहून त्यांना अनुभवायचं होतं. म्हणूनच त्या लगेचच परदेशातून भारतात निघून आल्या. आता त्यांनी अशोक यांचं भरभरुन कौतुक केलं आहे. (Nivedita saraf talk about ashok saraf)
ITSMAJJA शी संवाद साधताना निवेदिता यांनी अशोक यांचं कौतुक केलं. तसेच हा पुरस्कार मिळायला उशीर झाला असल्याचंही मत त्यांनी व्यक्त केली. निवेदिता म्हणाल्या, “त्यांना पुरस्कार मिळाला हा क्षण मी अनुभवला नसता तर मी आता ढसाढसा रडत असते. मला काहीच सुचलं नसतं. माझ्या नवऱ्याला पद्मश्री पुरस्काराने सन्मानित करण्यात आलं हा आमच्या आयुष्यात सगळ्यात मोठा क्षण होता. मी तिथे असणं कशाहीपेक्षा मोठंच होतं.
“मी तिथे पोहोचू शकले यासाठी मी परमेश्वराचे आभार मानते. २५ किंवा २६ तारखेला पुरस्कार प्रदान करण्यात आला असता तर मी आले नसते. २७ तारखेला सोहळा झाला. धावत पळत मी फ्लाइट बूक करत सोहळ्यासाठी पोहोचले. अशोक नेहमीच दुसऱ्यांनाही बरोबर घेऊन जातात. खूप दिग्गज कलाकार असतात जे दुसऱ्याचा सीन स्वतःवर फिरवून घेतात, दुसऱ्याचे डायलॉग कट करतात, एडिटींगमध्ये ढवळाढवळ करतात. असं आपण खूप बघत आलो आहोत”.
“पण अशोक कधीच असं करत नाही. ते स्वतःबरोबर दुसऱ्यालाही मोठं करतात हे नेहमीच सगळ्यांनीच शिकलं पाहिजे. बरोबरच्या कलाकाराला मनमोकळं राहू देतात. दुसऱ्या व्यक्तीचा जर सीन असेल तर तो त्याचाच राहू देतात. पद्मश्री मिळणार हे जेव्हा जाहिर झालं तेव्हा खूप भारी वाटलं. देर आए दुरुस्त आए असं वाटलं. आधीच मिळालया हवं होतं. पण खूप आनंदाची भावना होती”. निवेदिता यांनी अभिमानाने अशोक यांचं कौतुक केलं.
