मराठी मनोरंजनसृष्टीत आपल्या हटके दिग्दर्शनाने नाव लौकिक मिळवणारे नागराज मंजुळे आता ओटीटी क्षेत्रात आपलं पदार्पण करत आहेत. यासंदर्भात अधिकृत घोषणा नुकतीच करण्यात आली. सध्या प्रेक्षकवर्ग मोठ्या प्रमाणात ओटीटी या माध्यमांवरील अनेक वेबसीरिज प्रामुख्याने पाहताना दिसतो. त्यामुळे चित्रपट, मालिका यांच्या तुलनेत वेगवेगळ्या वेब सीरिजची निर्मती मोठ्या प्रमाणात केली जाते. सैराट, नाळ अशा अनेक हिट चित्रपटांच्या निर्मिती नंतर दिग्दर्शक, निर्माते असणारे नागराज मंजुळे देखील आता ओटीटी क्षेत्राकडे आपली वाटचाल करताना पाहायला मिळत आहेत. ‘मटका किंग’ रतन खत्री यांच्या आयुष्यावर आधारित नागराज मंजुळे यांची ही नवीन वेबसीरिज असल्याचं सांगण्यात आलं आहे.( Nagraj Manjule New Web Series Matka King )
एका कार्यक्रमा दरम्यान नागराज मंजुळे यांनी ॲमेझॉन प्राईम या ओटीटी प्लॅटफॉर्म वर ‘मटका किंग’ ही वेबसीरिज आणणार असल्याचं सांगितलं. या वेब सीरिजमध्ये अभिनेता विजय वर्मा मुख्य भूमिकेत झळकणार असून आणखी प्रसिद्ध चेहरे देखील या वेबसीरिजमध्ये झळकणार असल्याच्या चर्चा आहेत. नागराज यांच्या या आगामी वेबसीरिजच्या निर्मितीची धुरा सिद्धार्थ रॉय कपूर यांच्या हाती असून लवकरच ही वेबसीरिज प्रेक्षकांच्या भेटीला येणार आहे.
नागराज मंजुळे यांचं दिगदर्शन आणि विजय वर्मा यांचा करारी अभिनय या वेबसीरिजमध्ये किती रंगत आणणार या बाबत चाहते उत्सुक दिसत आहेत. नागराज मंजुळे यांच्या या नवीन प्रोजेक्ट्च्या घोषणे नंतर त्यांच्या चाहत्यांमध्ये कमालीचा आनंद पाहायला मिळत आहे. आता नागराज मंजुळे आपल्या हटके दिग्दर्शन पद्धतीने या वेबसीरिजमध्ये कोणती नवीन गोष्ट आणणार हे पाहणं देखील रंजक ठरणार आहे. ( Nagraj Manjule New Web Series Matka King )
‘मटका किंग’ या वेबसीरिजमध्ये रतन खत्री ही मुख्य भूमिका अभिनेता विजय वर्मा साकारणार असून त्याने या आधी अनेक वेब सीरिजमध्ये वेगवेगळ्या भूमिका पार पाडल्या आहेत. तसेच मिर्जापूर या लोकप्रिय ठरलेल्या वेबसीरिजमध्ये देखील विजय मुख्य भूमिकेत दिसला होता. तसेच ‘मिर्जापूर ३’ या वेब सीरिजचीदेखील नुकतीच घोषणा करण्यात आली. त्यामुळे विजय वर्माच्या चाहत्यांना ‘मटका किंग’ व ‘मिर्जापूर ३’ या दोन्ही वेबसीरिजमध्ये विजयला पाहा येणार आहे.
