Armaan Malik Engagement : बॉलिवूडचा सुप्रसिद्ध गायक अरमान मलिकच्या गाण्याचे लाखो चाहते आहेत. तरुण मंडळींमध्ये तर अरमानची गाणी अधिक लोकप्रिय आहेत. लाखो तरुणींच्या गळ्यातील ताईत असणाऱ्या या गायकाने आता त्याच्या चाहत्यांना आनंदाची बातमी दिली आहे. अरमानने साखरपुडा केला आहे. त्याने त्याच्या इन्स्टाग्राम अकाऊंटद्वारे साखरपुड्याचे फोटो शेअर केले आहेत. युट्युबर व व्लॉगर आशना श्रॉफबरोबर अरमानने साखरपुडा केला. त्याने शेअर केलेल्या फोटोंची सध्या सोशल मीडियावर चर्चा रंगत आहे.
अरमानने शेअर केलेल्या फोटोंमध्ये तो आशनाला गुडघ्यावर बसून अंगठी घालताना दिसत आहे. तर दुसऱ्या फोटोमध्ये तो तिला किस करत आहे. दरम्यान या दोघांच्या चेहऱ्यावरील आनंद अगदी पाहण्यासारखा आहे. या फोटोंमध्ये आशना वेस्टर्न ड्रेसमध्ये दिसत आहे. तर अरमानने ब्लेजर घातला आहे. अरमानने फोटो शेअर करताच त्याच्यावर शुभेच्छांचा वर्षाव होत आहे. चाहते त्याच्या नव्या आयुष्यासाठी शुभेच्छा देत आहेत.
आणखी वाचा – “जो भी होगा, देखा जायेगा,” संतुर जोडी नारकर कपलचा भन्नाट डान्स, व्हिडीओ पाहून नेटकरी म्हणाले, “नारकर साहेब…”
“…आणि आमच्या नव्या आयुष्याला सुरुवात झाली” असं अरमानने फोटो शेअर करत म्हटलं आहे. काही वृत्तसंस्थेनुसार, आशना अरमानपेक्षा दोन वर्षांनी मोठी आहे. ती फॅशन व ब्युटी व्लॉग करते. तसेच सोशल मीडिया सेलिब्रिटी अशी आशनाची ओळख आहे. लंडनमध्ये आशनाने तिचं फॅशन क्षेत्राशी संबंधित शिक्षण पूर्ण केलं. याआधी फोटोग्राफर सिद्धांतबरोबर तिचं नाव जोडण्यात आलं होतं.
आशना व अरमानच्या फोटोंना नेटकऱ्यांची अधिकाधिक पसंती मिळताना दिसत आहे. तसेच अनेक सेलिब्रिटी मंडळींनी अरमानच्या फोटोंना पसंती दर्शवली आहे. अरमानने आजवर ‘जहर’, ‘बोल दो न जरा’, ‘पहला प्यार’ सारखी सुपरहिट गाणी गात प्रेक्षकांचं मनोरंजन केलं. वयाच्या चौथ्या वर्षीच त्याने ‘सा रे ग म पा लिटिल चॅम्प्स’ कार्यक्रमात सहभाग घेतला होता.
