बॉलिवूड अभिनेता अरबाज खान हा त्याच्या वैवाहिक आयुष्यामुळे नेहमीच चर्चेत राहिला आहे. अशातच त्याच्याबाबत एक नवीन बातमी समोर येत आहे. अरबाज लवकरच लग्न करणार असल्याच्या चर्चा सोशल मीडियावर रंगत आहेत. मलायका अरोराबरोबर घटस्फोट घेतल्यानंतर अरबाज जॉर्जिया एंड्रीयानीबरोबर रिलेशनमध्ये होता. काही वर्षे एकत्र राहिल्यानंतर त्यांच्यात ब्रेकअप झाला आणि दोघांनी एकमेकांपासून वेगळे होण्याचा निर्णय घेतला. (Arbaaz Khan Getting Married)
अशातच आता अरबाजच्या आयुष्यात आणखी एका मुलीची एण्ट्री झाली आहे. इतकंच नव्हे तर दोघे त्यांच्या रिलेशनला घेऊन इतके गंभीर आहेत की ते येत्या काळात ते लग्न करणार असल्याचे म्हटले जात आहे. दोघांच्या लग्नाच्या अनेक चर्चा सध्या सोशल मीडियावर रंगत आहेत. मलायका, जॉर्जियानंतर अरबाजच्या आयुष्यात आलेल्या या तिसऱ्या व्यक्तीमुळे अनेकांच्या भुवया उंचावल्या आहेत.
न्यूज १८ च्या एका रिपोर्टनुसार, अरबाज बॉलिवूड मेकअप आर्टिस्ट शुरा खानला डेट करत आहे. इतकेच नव्हे तर हे दोघे लवकरच लग्न करणार आहेत. अरबाज व शुरा हे दोघे त्यांच्या नात्याबद्दल आश्वासक आहेत आणि एकमेकांबरोबर लग्न करुन ते त्यांच्या नात्याला आणखी पुढे घेऊन जाणार आहेत. त्यांच्या या लग्नाला जवळचे काही मित्र व कुटुंबीय उपस्थित राहणार असल्याचे म्हटले जात आहे.
दरम्यान, अरबाज खानने १९९८ मध्ये मलायकाबरोबर लग्नगाठ बांधली होती. पण लग्नानंतर १९ वर्षांनी त्यांच्यात घटस्फोट झाला. मग अरबाज जॉर्जियाबरोबर रिलेशनमध्ये होता. मात्र तिच्याबरोबरही त्याचा ब्रेकअप झाला आणि आता तो शुराबरोबर लग्न करणार आहे. त्यामुळे अनेकांना आश्चर्याचा धक्का बसला आहे. त्याचबरोबर अरबाज व शुरा यांच्या लग्नाच्या बातमीमध्ये कितपत तथ्य आहे, हे पाहण्यासाठी अनेकजण उत्सुक आहेत.