बॉलिवूड अभिनेत्री तापसी पन्नूने नुकतंच गुपचुप लग्न करत सर्वांना धक्का दिला होता. अशातच आता तिच्या पाठोपाठ अभिनेत्री अदिती राव हैदरीने दुसरं लग्न केल्याची बातमी समोर आली आहे. आदितीने दाक्षिणात्य अभिनेता सिद्धार्थबरोबर विवाह केला असल्याचे म्हटलं जात आहे. आदिती व सिद्धार्थ यांनी आज (२७ मार्च) रोजी तेलंगणामधील वानापर्थी जिल्ह्यातील श्रीरंगापुरम येथील श्री रंगनायकस्वामी मंदिरात लग्न केलं असल्याचं वृत्त ‘ग्रेट आंध्र’ने दिलं आहे.
अर्थात याबद्दल अदिती किंवा सिद्धार्थ यापैकी कुणीही अधिकृतपणे घोषणा केलेली नाही. किंवा त्यांच्या कुटुंबातील कोणीही याबाबत काहीच माहिती दिलेली नाही. तसेच त्यांच्या लग्नाचे फोटो अथवा व्हिडीओ समोर आलेले नाहीत. पण त्यांनी खासगी समारंभात साधेपणाने लग्न केल्याच्या चर्चा होत आहेत. त्यामुळे सोशल मीडियावर चाहते त्यांच्या लग्नाच्या फोटोची आतुरतेने वाट पाहत आहेत.
२०२१ मध्ये प्रदर्शित झालेल्या ‘महा समुद्रम’ या चित्रपटामध्ये आदिती व सिद्धार्थने एकत्र काम केले होते. आदिती व सिद्धार्थ अनेक चित्रपट कार्यक्रमांमध्ये एकत्र दिसले आहेत. एवढेच नाही तर दोघेही अनेकदा सुट्टीनिमित्त एकत्र फिरताना दिसले आहेत. त्याचबरोबर दोघेही अनेकदा त्यांच्या सोशल मीडियावरील रिल्समध्येही एकत्र दिसले आहेत. अशातच आता या जोडप्याने लग्न केल्याची माहिती समोर आली आहे.
अर्थात यावर अदिती किंवा सिद्धार्थ यांनी या वृत्ताला दुजोरा दिल्यानंतरच त्यांच्या लग्नाच्या बातमीवर शिक्कामोर्तब होईल. दरम्यान, अदितीचे पहिले लग्न २००९ मध्ये सत्यदीप मिश्राबरोबर झाले होते आणि त्यानंतर २०१३ मध्ये दोघे वेगळे झाले. सिद्धार्थचेही हे दुसरे लग्न असेल. सिद्धार्थचे पहिले लग्न २००३ मध्ये झाले आणि २००७ मध्ये त्याचा घटस्फोट झाला आहे.