‘आई कुठे काय करते’ ही मालिका गेली सव्वाचार वर्ष प्रेक्षकांचं भरभरुन मनोरंजन करत आहे. या मालिकेतील कलाकार मंडळीही प्रेक्षकांच्या मनात घर करून आहेत. या मालिकेमुळे अभिनेत्री मधुराणी प्रभुलकर हिला खऱ्या अर्थाने लोकप्रियता मिळाली. अभिनेत्रीला अरुंधती या पात्रामुळे विशेष ओळख मिळाली. मात्र मालिकेत आलेल्या टर्न-ट्विस्टमुळे अभिनेत्रीला बरेचदा ट्रोलिंगचा सामनाही करावा लागला आहे. बरेचदा अभिनेत्री सोशल मीडियावरही बऱ्यापैकी सक्रिय असलेली पाहायला मिळाली आहे. (Madhurani Prabhulkar Post)
सध्या मालिकेत खूप मोठं रंजक वळण आलेलं पाहायला मिळालं. अरुंधतीचा मालिकेतील नवा प्रवास सुरु होणार असल्याचं दाखवण्यात आलं. तर अरुंधतीचा नवरा आशुतोषचा मालिकेत मृत्यू दाखवण्यात आला. आशुतोषच्या मृत्यूने सोशल मीडियावर चांगलीच चर्चा रंगलेली पाहायला मिळाली. आशुतोषची मालिकेतील एक्झिट चाहत्यांच्या पसंतीस पडली नाही. तर चाहते, प्रेक्षक व कलाकार मंडळीही आशुतोषला मालिकेत मिस करताना दिसले. तर अभिनेत्री मधुराणी हिनेदेखील ओंकार गोवर्धन म्हणजेच आशुतोषसाठी खास पोस्ट शेअर करत मिस करत असल्याचं म्हटलं.
मधुराणीने खास सीन दरम्यानचे एकत्र फोटो शेअर करत कॅप्शन देत म्हटलं की, “मधले काही दिवस कोणतीही पोस्ट करायच्या मनस्थितीमध्ये नव्हते त्यामुळे ही पोस्ट उशिराने करतेय. आशुतोषचं जाणं अनेकांना आवडलं नाही. कसं आवडेल. आपल्याला आयुष्यात घडणाऱ्या अप्रिय घटना आवडत नाहीत पण त्या स्वीकाराव्या लागतात. तसंच आशुतोषच जाणं आपल्याला स्वीकारावं लागेल. गेले अनेक दिवस दुखवट्याचे सीन करत आहे. १२/ १३ तास सलग असे काही दिवस रडत आहे. अभिनय अभिनय म्हटलं तरी तुमच्यातला एक भाग तुम्ही ओतता, काही पणाला लावता तेव्हाच तो खरा वाटतो. हे काही दिवस प्रचंड थकवणारे होते. इतके की त्याचा काही प्रमाणात तब्येतीवरही परिणाम झालाच”.
पुढे तिने लिहिलं आहे की, “डेलीसोपमध्ये भावनिक व्यवस्थापन करण्यासाठी बऱ्याचदा वेळ मिळत नाही. आणि त्याचे परिणाम दिसून येतात. अरुंधती आशुतोषला मिस करत आहे तशीच आम्हा सगळ्यांना ओंकारची तितकीच आठवण येत आहे. ओंकार आपल्या फालतू पासून गंभीर विषयावरच्या गप्पा, नव्वदीतील गाणी मोठमोठ्याने गाणं, विषय कुठलाही असो त्यातील तुला सखोल माहीत असणं, आणि आजूबाजूचं वातावरण हसतखेळत ठेवायचं तुझं कसब, हे सगळं मिस करत आहे. पुढे परत काम करुच. पण हा प्रवास कायम स्मरणात राहील”.
