सुप्रसिद्ध अभिनेत्री शेफाली जरीवालाचं निधन झालं आहे. ती फक्त ४२ वर्षांची होती. शुक्रवारी (२८ जून) रात्री शेफालीच्या निधनाची बातमी सगळीकडे वाऱ्यासारखी पसरली. दरम्यान तिला हृदयविकाराचा झटका आला असल्याची प्राथमिक माहिती समोर आलेली आहे. अद्यापही शेफालीचं कुटुंब किंवा डॉक्टरांकडून कोणतीच अधिकृत माहिती समोर आलेली नाही. शेफालीला घरातूनच मृतावस्थेत रुग्णालयात आणण्यात आलं होतं. अंधेरीतील बेलेव्ह्यु मल्टीस्पेशालिस्ट रुग्णालयात तिला आणलं असता अनेकांना मोठा धक्काच बसला. मात्र काही वेळातच शेफालीला मृत घोषित करण्यात आलं. पत्रकार विकी लालवानीने पोस्ट शेअर करत निधनाची माहिती दिली. आता पोलिस या संपूर्ण घटनेचा तपास करत आहेत. (Shefali Jariwala husband statement)
शेफालीच्या मृत्यूप्रकरणी पोलिस तिच्या कुटुंबियांची तसेच तिच्याबरोबर असलेल्या प्रत्येक व्यक्तीची चौकशी करत आहेत. अशातच तिच्या घरी फॉरेन्सिक टीमही पोहोचली आहे. पोलिसांनी आतापर्यंत शेफालीचा पती पराग त्यागीसह आणखी तीन व्यक्तींचा जबाब नोंदवला आहे. यामध्ये एक नोकर आणि दोन सिक्युरीटी गार्ड यांचाही समावेश आहे. अजूनही पोलिसांची चौकशी पूर्ण झालेली नाही.
आणखी वाचा – ‘कांटा लगा गर्ल’ शेफाली जरीवालाचे हृदयविकाराच्या झटक्याने निधन, वयाच्या ४२व्या वर्षी घेतला अखेरचा श्वास
एबीपी न्यूजच्या वृत्तानुसार, परागने पोलिसांच्या चौकशीमध्ये काही खुलासे केले. आधीच शेफालीवर उपचार सुरु असल्याचं परागने पोलिसांना सांगितलं होतं. आता हे उपचार नक्की कसले होते?, शेफालीला कसला त्रास होत होता?, काही आजार होता का? हे अद्याप समोर आलेलं नाही. पराग शेफालीचा दुसरा पती आहे. २००४मध्ये शेफालीचं पहिलं लग्न झालं होतं. हरमीत सिंहबरोबर शेफालीने संसार थाटला. मात्र लग्नाच्या पाच वर्षांमध्येच त्यांनी घटस्फोट घेण्याचा निर्णय घेतला. २००९मध्ये शेफाली व हरमीतचा घटस्फोट झाला.
आणखी वाचा – “मुंबईत मराठीची वाट लागली”, हिंदी सक्तीनंतर मराठमोळा अभिनेत्याचा रोष, स्पष्टच म्हणाला, “भिकारणीची अवस्था…”
शेफालीने पहिला पती हरमीतवर अनेक गंभीर आरोप केले होते. मानसिक छळ, शारीरिक अत्याचार करत असल्याचं शेफालीने म्हटलं होतं. कौटुंबिक वादामधून तिचा घटस्फोट झाला. घटस्फोटाच्या सहा वर्षांनंतर म्हणजेच २०१५मध्ये तिने परागबरोबर लग्न करण्याच निर्णय घेतला. दोघांचा संसार अगदी सुखाचा सुरु होता. त्यांचे फोटो व व्हिडीओ पाहिल्यानंतर ते लक्षातही येतं. शिवाय कलाक्षेत्रातही शेफालीने स्वतःचं अस्तित्व निर्माण केलं. ‘काटा लगा’ गाण्यामुळे तिला आयुष्यभराची एक वेगळीच ओळख मिळाली. शिवाय बिग बॉस १३, नच बलिए ५, नच बलिए ७मध्येही ती सहभागी झाली होती.
