सुप्रसिद्ध अभिनेत्री शेफाली जरीवालाच्या निधनानंतर संपूर्ण कलाक्षेत्रालाच मोठा धक्का बसला आहे. तिचं वय अवघं ४२ वर्ष होतं. हृदयविकाराचा झटका आल्यामुळे शेफालीचं निधन झालं असल्याचं प्राथमिक माहिती समोर आलेली आहे. मात्र नक्की कारण काय? याबाबत कोणतीच अधिकृत माहिती कुटुंबिय किंवा पोलिसांकडून समोर आलेली नाही. पोलिस या संपूर्ण प्रकरणाची कसून चौकशी करत आहेत. काही तासांपूर्वीच फॉरेन्सिक टीमही शेफालीच्या घरी दाखल झाली आहे. अशातच आता पोलिसांनीही शेफालीचा पती पराग त्यागी, सिक्युरीटी गार्ड व नोकर यांची चौकशी केली आहे. दरम्यान अभिनेत्रीच्या राहत्या इमारतीमधील सिक्युरीटी गार्डने नक्की काय घडलं? याबाबत सांगितलं. (Shefali Jariwala security guard statement)
शेफाली व पराग यांचं मुंबईतील अंधेरी परिसरात घर आहे. शुक्रवारी (२७ जून) रात्री अचानक धावपळ सुरु झाल्यानंतर सिक्युरीटी गार्डलाही काय झालं? याचा अंदाज येईना. त्याला शेफालीचं निधन झालं असल्याचंही माहित नव्हतं. यासंपूर्ण प्रकरणाबाबत शेफाली राहत असलेल्या इमारतीच्या सिक्युरीटी गार्डने प्रसारमाध्यमांशी संवाद साधला. शेफाली व तिचा पती खूप चांगल्या स्वभावाचे आहेत असंही त्याचं म्हणणं आहे. मात्र इतर अधिकृत माहिती देण्यास त्याने नकार दिला.
आणखी वाचा – “तिच्यावर उपचार सुरु होते आणि…”, शेफाली जरीवालाच्या पतीने पोलिसांना नक्की काय सांगितलं?, चौकशी सुरु
सिक्युरीटी गार्ड म्हणाला की, “मी शेफाली यांना काही पाहिलं नाही. पण त्यांची गाडी इमारती बाहेर जात असताना मीच गेट उघडला. यावेळी सुमारास १० ते १०.१५ वाजले असतील. पण त्यानंतर नक्की काय घडलं? याबाबत मला काहीच माहिती नाही. मला कोणीतरी येऊन सांगितलं की, शेफाली यांचं निधन झालं आहे. तेव्हा रात्रीचे बहुदा १ वाजले असावते. बाईकवरुन कोणीतरी एक व्यक्ती आला त्याने मला शेफाली यांचा फोटो दाखवत निधनाबाबत सांगितलं”.
“त्या व्यक्तीच्या सांगण्यावर मी काही विश्वास ठेवला नाही. कारण शेफाली आधी व्यवस्थित होत्या. त्यांचा तो मित्र असावा. मीही त्याला सांगितलं की, मला निधनाबाबत काही माहीत नाही. तुम्ही घरी जाऊन विचारु शकता. मात्र चौकशी करणारी व्यक्ती घरी न जाता रुग्णालयात गेली”. सिक्युरीटी गार्डला यापुढे अधिक काही माहिती नव्हती. त्याला जे चित्र दिसलं ते त्याने सांगितलं. मात्र आता शेफालीचं निधन म्हणजे एक गुढ आहे. पोलिसही इतका तपास का करत आहेत? असे प्रश्न वारंवार समोर येत आहेत. शिवाय घरीच मृतावस्थेत शेफाली दिसल्यामुळे अनेक चर्चांना उधाण आलं आहे.
