अभिनेत्री क्रांती रेडकर नेहमीच काही ना काही शेअर करत चाहत्यांच्या संपर्कात राहत असते. सोशल मीडियावर सक्रिय असणाऱ्या अभिनेत्रींच्या यादीत क्रांतीच नाव आवर्जून घेतलं जात. क्रांती नेहमीच न पटलेल्या मुद्द्यांवर भाष्य करताना दिसते. बरेचदा ती तिच्या पतीबाबतच्याही पोस्ट शेअर करताना दिसते. क्रांतीचे पती समीर वानखेडे हे NCB चे अधिकारी आहेत. NCB मध्ये उच्च पदावर कार्य करत असताना त्यांच्यावर बरेच आरोप-प्रत्यारोप झाले. याबाबतही क्रांती तिच्या पतीच्या पाठीशी खंबीरपणे उभी असल्याच्या पोस्ट शेअर करताना दिसते. (Kranti Redkar Post For Her Husband)
कोर्डिलिया क्रूझ अमली पदार्थ प्रकरणात शाहरुख खानचा मुलगा आर्यन खानला आरोपी घोषित केल्यानंतर त्याच्या सुटकेसाठी समीर वानखेडे यांनी शाहरुखकडून २५ कोटी रुपयांची खंडणी मागितली, असल्याचा आरोप त्यांच्यावर लागवण्यात आला. या आरोपाखाली वानखेडे यांच्यासह चार जणांविरोधात सीबीआयने गुन्हा दाखल केला. त्यादरम्यान ईडीनेही वानखेडे यांच्याविरोधात गुन्हा दाखल केला. या प्रकरणी आता वानखेडेंना काहीसा दिलासा मिळाल्याचं पाहायला मिळत आहे. क्रांतीने याबाबतची पोस्ट शेअर करत माहिती दिली आहे.
सदर प्रकरणात राष्ट्रीय प्रशासकीय न्यायाधिकरण यांनी वानखेडेंना दिलासा देत त्यांच्या बाजूनं निर्णय दिला होता. त्यानंतर वानखडे यांनी दिल्ली हायकोर्टात धाव घेतली होती. या प्रकरणात आता दिल्ली उच्च न्यायालयाने वानखेडेंना मोठा दिलासा दिला आहे. दिल्ली हायकोर्टाच्या या निर्णयानंतर समीर वानखेडेंची पत्नी अभिनेत्री क्रांती रेडकर हिने एक पोस्ट शेअर केली आहे. ‘विजय हा सत्याचाच होणार’, असं कॅप्शन देत तिने न्यायालयाचे अपडेट्स असलेली एक पोस्ट शेअर केली आहे. या पोस्टबरोबर तिने, “पुन्हा सत्याचा विजय झाला आहे. सत्यमेव जयते! मी नेहमीच तुझ्याबरोबर असेन, माय लव्ह”, असं लिहिलं आहे.
क्रांतीची नवऱ्यासाठीची कौतुक करणारी ही खास पोस्ट तिने शेअर करताच यावर चाहत्यांनी भरभरुन कमेंटचा वर्षाव केला आहे. अनेकांनी या पोस्टवर कमेंट करत ‘विजय सत्याचाच होणार’, असं म्हणत त्यांना पाठिंबा दिला आहे.
