कोविडनंतर अनेकांना कठीण काळाचा सामना करावा लागला. यादरम्यान एका लोकप्रिय व दिग्गज अभिनेत्याला एका गंभीर आजाराचा सामना करावा लागला. हा अभिनेता म्हणजे प्रेक्षकांचा लाडका अभिनेता विद्याधर जोशी उर्फ बाप्पा जोशी. करोनाकाळात त्यांना फुप्फुसांचा फायब्रॉसिस हा गंभीर आजार झाल्याचं समोर आलं. त्यानंतर आणखी काही चाचण्या केल्यावर फुफ्फुसं १३ टक्के निकामी झाल्याचं समजलं. या गंभीर आजारपणाचा सामना करत बाप्पा जोशी यांनी या आजारावर मात केली आहे. यावेळी त्यांचे संपूर्ण कुटुंब त्यांच्याबरोबर होते. (Vidyadhar Joshi Incident)
या त्यांच्या आजारपणात त्यांच्या पत्नी त्यांच्या पाठीशी खंबीरपणे उभ्या होत्या. अशातच या आजारपणाबाबत त्यांनी नुकत्याच मित्र म्हणे या पॉडकास्टला दिलेल्या मुलाखतीत भाष्य केलं आहे. शस्त्रक्रिया झाल्यानंतरचा नागावर शहारे आणणारा एक किस्सा सांगत ते म्हणाले, “ऑपरेशन झाल्यानंतर खरी काळजी घेण्याची आवश्यकता असते. ऑपरेशननंतर मी आयसीयूमध्ये होतो. मला काहीच शुद्ध नव्हती. यावर बाप्पा जोशी यांची बायको म्हणाली, “सुरुवातीला आम्हाला सांगितलं होत की, किमान १०-१२ दिवस आम्हाला भेटता येणार नाही. आम्ही बाहेरून काचेतून त्यांना बघू शकत होतो. पण ७२ तास उलटून गेल्यावरही ते शुद्धीवर आले नाहीत. त्यामुळे काळजीच वातावरण वाढलं. तेव्हा डॉक्टर माझ्याजवळ आले आणि म्हणाले की, आम्हाला तुमची मदत हवी आहे. तुम्ही त्यांना जाग करु शकता का?, ते प्रतिसाद देत नाही आहेत. डॉक्टरांना सुरुवातीला वाटलं की, मी घाबरेन. पण मला आयसीयूमध्ये जाऊन त्याला बघायला मिळणार म्हणून होकार दिला.
पुढे त्या म्हणाल्या, “सतत हॉस्पिटलमध्ये असल्याने खूप टेन्शनही होत, एकप्रकारची बधिरता होती, त्यामुळे मी आयसीयूमध्ये जायला होकार दिला. आतमध्ये पीपीई किट घालून आत गेले, तेव्हा हा झोपलेला होता. डॉक्टर म्हणाले, मी त्यांना उठवायचा खूप प्रयत्न केला. ते ह्यांना विद्याधर या नावाने उठवत होते. याला विद्याधर या नावाने कोणीच ओळखत नाही. आम्ही घरी याला राजन नावाने बोलावतो न बाहेत याला बाप्पा म्हणतात. मी तिकडे जाऊन राजन ए राजन इतकाच आवाज दिला. आणि हे ऐकून याने एकदम डोळे उघडले.
पुढे बाप्पा म्हणाले, “हा क्षण मलाही अजून आठवतो. मला ती एक हाक आठवतेय. घाबरुन नाही. एरव्ही बायकोच्या आवाजाला घाबरुन ओ देते हे ऐकून नाही”, असं ते गमतीत म्हणाले. हा किस्सा सांगताना दोघांच्याही डोळ्यात अश्रू आलेले पाहायला मिळाले.
