Priya Marathe death news : अभिनेत्री प्रिया मराठेच्या अकाली निधनाच्या बातमीने संबंध सिनेसृष्टीला मोठा धक्का बसला. अभिनेत्रीची कर्करोगाशी झुंज अपयशी ठरली आणि वयाच्या अवघ्या ३८ व्या वर्षी अभिनेत्रीने या जगाचा निरोप घेतला. प्रियाचे हे अचानक असे निघून जाणे खूप धक्कादायक आहे. केवळ मराठीच नव्हे तर हिंदी सृष्टीलाही प्रियाच्या जाण्याने धक्का बसला आहे. पवित्र रिश्ता या मालिकेतून प्रियाने हिंदी टेलिव्हिजनवर आपले स्थान निर्माण केलं. या मालिकेत अंकिता लोखंडे मुख्य भूमिकेत पाहायला मिळाली. तर प्रिया मराठे आणि प्रार्थना बेहेरे या दोन मराठी अभिनेत्रीही झळकल्या. प्रिया, अंकिता, प्रार्थना या तिघींची सेटवर चांगलीच गट्टी होती.
प्रियाला शेवटचे पाहण्यासाठी प्रार्थना बेहेरे उपस्थित होती, यावेळी तिला अश्रूही अनावर झाले. तर अंकिताने प्रियासाठी पोस्ट शेअर करत भावना व्यक्त केल्या. अंकिता लोखंडेने दुःख व्यक्त करत लिहिले, “‘पवित्रा रिश्ता’ मालिकेतील प्रिया माझी पहिली मैत्रीण होती. मी, प्रार्थना आणि प्रिया… आम्हा तिघींची एकत्र गैंग होती. आम्ही तिघी नेहमी एकत्र असायचो. खूप मजा करायचो. प्रिया, ग्रॅट्स (प्रार्थना) आणि मी आम्ही तिघी एकमेकींना मराठीत प्रेमाने ‘वेडे’ म्हणायचो. ‘वेडे’ अशीच हाक मारायचो. ती माझ्याबरोबर माझ्या चांगल्या दिवसांमध्ये होती आणि दुःखातही प्रियाने माझी साथ कधीच सोडली नाही. जेव्हा-जेव्हा मला तिची गरज भासली त्या प्रत्येक क्षणाला प्रिया माझ्याबरोबर होती.
पुढे तिने लिहिलं, “गणपती बाप्पाचं आगमन झाल्यावर ती नेहमी गौरीच्या आरतीला माझ्याकडे यायची. तिने आमच्या घरची आरती कधीही चुकवली नव्हती. आता यावर्षी प्रिया मी तुझ्यासाठी प्रार्थना करेन. माझी वेडे. खरंच खूप आठवण येतेय तुझी. प्रियाने गेल्या काही वर्षांत खूप धीराने, खंबीरपणे या आजाराचा सामना केला. आज ती आपल्याबरोबर नाही. हे लिहिताना सुद्धा माझं मन भरून येतंय. माणूस आपल्या सुंदर हास्यामागे किती काय-काय सहन करत असतो हे कधीच कोणाला कळू शकत नाही याची जाणीव आता ती सोडून गेल्यावर होत आहे”.
आणखी वाचा – Priya Marathe Death : मोठा धक्का! सुप्रसिद्ध अभिनेत्री प्रिया मराठेचे निधन, मराठी कलाविश्वावर शोककळा
अंकिता शेवटी लिहिते, “प्रिया… माझी प्रिय वेडे. तू कायम माझ्या हृदयात राहशील, तुझी प्रत्येक आठवण कायम माझ्या मनात असेल. आपण पुन्हा भेटेपर्यंत. ओम शांती”. गौराईच्या आगमनाला अंकिताने प्रियाला खूप मिस केलं.
