Sankarshan Karhade : लेखक, कवी, अभिनेता आणि सूत्रसंचालक या चार क्षेत्रात नेहमीच आपला दबदबा निर्माण करणारा अभिनेता म्हणजे संकर्षण कऱ्हाडे. संकर्षणने आजवर अनेक त्याच्या अभिनयाच्या जादूने रसिकांच्या मनात घर केलं, सध्या रंगभूमीवर संकर्षण आपल्या अभिनयाने छाप पाडत आहे. संकर्षणचा खूप मोठा चाहतावर्ग आहे. संकर्षणला त्याच्या कामाची नेहमीच पोचपावती मिळालेली पाहायला मिळाली आहे. आणि चाहत्यांच्या या प्रेमाबाबत संकर्षण नेहमीच सोशल मीडियावर पोस्ट करताना दिसतो. अशातच संकर्षणने चाहत्याच्या एका मॅसेजची पोस्ट शेअर केली आहे. यामध्ये संकर्षण भारावून गेल्याचं पाहायला मिळत आहे. सध्या संकर्षणच ‘नियम व अटी लागू’ हे नाटक जोरात सुरु आहे.
संकर्षणला त्याच्या एका चाहत्यानं सोशल मीडियावर आईच्या वाढदिवसानिमित्त तिला तुझं ‘नियम व अटी लागू’ हे नाटक दाखवत असल्याचा मॅसेज केला. त्या चाहत्यानं संकर्षणला मॅसेज करत म्हटलं आहे की, “माझ्या आईचा ६० वा वाढदिवस आहे. तिच्यासाठी एक सरप्राइज प्लॅन केलं आहे. तिला तुझं काम खूप आवडतं म्हणूनच तिला आणि तिच्या लहानपणीच्या मैत्रिणींना ‘नियम व अटी लागू’च्या बालगंधर्वमधील प्रयोगाला पाठवत आहे. आई जवळपास ३६ वर्षांनंतर नाटक बघायला येणार आहे. आशा आहे की, तिला हे सरप्राईज आवडेल”.
आणखी वाचा – शिल्पा शेट्टीच्या आईची प्रकृती बिघडली, हॉस्पिटलमध्ये दाखल, अभिनेत्री रुग्णालयात धावत पळत जाताना दिसली आणि…
हा मॅसेज पाहून संकर्षण भारावून गेला आहे. त्याबद्दल त्यानं सोशल मीडियावर भावुक प्रतिक्रिया व्यक्त केली आहे. त्यानं पोस्ट शेअर करत म्हटलं आहे की, “खरं सांगू…? कधी कधी खूप दमायला होतं. एनर्जी कुठून आणू, असा प्रश्नही पडतो. चिडचिड होते. आता मला कोणी नको, असा संताप होतो. पण… पण… असा एक मेसेज सोशल मीडियावर येतो की, कुणीतरी आपल्या आईच्या ६० व्या वाढदिवसाला तिला गिफ्ट म्हणून माझं नाटक दाखवतंय आणि अनेक वर्षांनंतर ती आई हा कलाकार आवडतो म्हणून यायला तयार होते”.
पुढे त्याने लिहिलं, “सगळं बाजूला राहतं आणि असा विचार येतो की, असा प्रयोग व्हावा की, अनेक वर्ष पोरांनी आपल्या आईला आणि आईनं पोरांना म्हणावं ‘जा या कलाकाराचं नाटक बघून ये’ अजून काय पाहिजे? तर हेच पाहिजे. आयुष्यभर हेच पाहिजे…”, असं त्याने लिहीत सोशल मीडियावर ही कौतुकाची पोस्ट शेअर केली आहे.
