लहान पडद्यावरील प्रसिद्ध अभिनेता व सूत्रसंचालक अर्जुन बिजलानी हा गेल्या काही दिवसांपासून चर्चेत आहे. सध्या तो ‘प्यार का पहला अध्याय: शिव शक्ति’ या मालिकेतून प्रेक्षकांच्या भेटीला येत आहे. पण काही दिवसांपूर्वी रुग्णालयात शस्त्रक्रियेसाठी दाखल झाला होता. त्याने उपचार घेण्यासाठी रुग्णालयात भरती झाल्याची स्टोरी इन्स्टाग्रामवरुन शेअर केली होती. यावर त्याच्या चाहत्यांनी चिंता व्यक्त केली होती. आता त्याच्याबद्दलचे मोठे वृत्त समोर येत आहे. (Arjun bijlani Instagram post)
अर्जुन ८ तारखेला पोटाच्या शस्त्रक्रियेसाठी दाखल झाला होता. पण आता खुद्द अर्जुननेच त्याबद्दल खुलासा केला आहे. शस्त्रक्रियेनंतर दोन दिवसांनी त्याला रुग्णालयातून डिस्चार्ज दिला आहे. त्यानंतर आपले काही फोटो शेअर करत त्याने चाहत्यांना तब्येतीची माहिती दिली आहे. तो सध्या घरी आराम करत असून त्याने आपल्या सोशल मीडिया अकाऊंटवर दोन फोटो शेअर केले आहेत आणि त्यावर लिहिले आहे की, “मी आता घरी आहे. मी माझ्या रिकव्हरी कॉर्नरमध्ये आहे”.
त्याच्या या पोस्टवर चाहत्यांनी आनंद व्यक्त केला आहे. एका चाहत्याने लिहिले आहे की, “तुला घरी पाहून आनंद झाला. आराम करा, नेहाला त्रास देऊ नका, तुमचा वेळ एंजॉय करा”, दुसरा चाहता लिहितो की, “तुम्हाला घरी असलेले पाहून खूप बरं वाटलं, आशा आहे की तुम्ही लवकरात लवकर ठीक व्हाल”. तसेच इतर नेटकरीही अर्जुनला घरी आराम करताना पाहून खूप खुश आहेत आणि तो लवकर बरा व्हावा यासाठी प्रार्थनाही करत आहेत.
काही दिवसांपूर्वीच अर्जुनने शस्त्रक्रिया झाल्यानंतर एक पोस्ट केली होती त्यामध्ये त्याने लिहिले होते की, “माझी शस्त्रक्रिया व्यवस्थित पार पडली आहे आणि मी आता रिकव्हर होत आहे. मला आज कालपेक्षा बरं वाटत आहे. मी आज माझ्या पायांवर उभा आहे. तुम्ही सर्वांनी माझ्यासाठी प्रार्थना केली त्यासाठी धन्यवाद. मी माझ्या आयुष्यात असणाऱ्या आणि मला पाठिंबा देणाऱ्या सर्वांचे आभार मानतो. तसेच डॉक्टर व कुटुंबाचेही आभार मानतो”.
अर्जुन लवकरच पूर्ण बरा होऊन आपले काम सुरू करेल असे सांगितले जात आहे.
