‘दंगल’ चित्रपटामधून छोटी बबिता म्हणून सर्वांच्याच पसंतीस पडलेली अभिनेत्री म्हणजे सुहानी भटनागर. नुकत्याच तिच्या आकस्मिक निधनाने मनोरंजन सृष्टीमधील अनेक कलाकारांनी दु:ख व्यक्त केले होते. मृत्यूसमयी तिचे वय अवघे १९ वर्ष होते. त्यामुळे सुहानीच्या अकाली निधनावर कलाकारांसह चाहत्यांनी शोक व्यक्त केला. काही दिवसांपूर्वी सुहानीच्या शोकसभेसाठी महिला कुस्तीपटू बबिता फोगाट उपस्थित राहिली होती. यावेळी तिने कुटुंबीयांचे सांत्वन केले व तिच्या आई-वडिलांना धीर दिला. अशातच आता बॉलिवूड अभिनेता आमिर खाननेदेखील नुकतीच सुहानीच्या फरीदाबाद येथील घरी भेट दिली.
काल (२२ फेब्रुवार) रोजी अभिनेता आमिरने सुहानीच्या घरी जाऊन आई-वडिलांची भेट घेतली व त्यांचे सांत्वन केले. तसेच यावेळी तिची फोटो फ्रेम देत आई-वडिलांबरोबर फोटोही काढला. काही दिवसांपूर्वी सुहानीचा अपघात झाला होता. त्यासाठी तिच्यावर उपचार सुरू होते. पण काही औषधांच्या दुष्परिणामांमुळे तिच्या शरीरात पाणी तयार होऊ लागले. यामुळे तिला ‘डर्मेटोमायोसिटिस’ हा दुर्मिळ आजारही झाला होता. यामुळे तिची रोगप्रतिकारक शक्ती कमी झाली होती. रुग्णालयात उपचार सुरू असताना तिला इन्फेक्शन झाले आणि फुप्फुसं कमजोर होऊन त्यामध्ये पाणी झाले. त्यामुळे तिला श्वास घेण्यासाठी त्रास होऊ लागला आणि यादरम्यान अभिनेत्रीचा मृत्यू झाला.
२०१६ मध्ये नितीश तिवारी दिग्दर्शित ‘दंगल’ हा चित्रपट प्रेक्षकांच्या भेटीस आला होता. यामध्ये आमिर खान,फातिमा सना शेख, सान्या मल्होत्रा, जायरा वसिम, सुहानी भटनागर, साक्षी तन्वर आणि अपारशक्ती खुराणा यांच्या दमदार भूमिका पाहायला मिळाल्या होत्या. या चित्रपटामध्ये महावीर सिंह फोगाट आणि त्यांच्या मुली बबिता व गीता फोगाट यांच्या संघर्षाची कहाणी दाखवली होती. सुहानीने या चित्रपटात आमीर खानच्या लहान मुलीची भूमिका बजावली होती.
आमिर खानच्या या कृतीमुळे सोशल मीडियावर सध्या त्याचे कौतुक केले जात आहे. दरम्यान आमिरच्या कामाबद्दल बोलायचे झाले तर आमिर सध्या अनेक चित्रपटांवर काम करत आहे. तसेच निर्मिती क्षेत्रामध्येही तो आपले नशीब आजमावत आहे. सध्या त्यांच्या प्रोडक्शन हाऊसची निर्मिती असलेला ‘लापता लेडीज’ हा चित्रपट लवकरच प्रेक्षकांच्या भेटीला येणार आहे.
