छोट्या पडद्यावरील अनेक लोकप्रिय मालिकांपैकी एक मालिका म्हणजे ‘आई कुठे काय करते?’ या मालिकेला सुरुवातीपासूनच प्रेक्षकांचा तुफान प्रतिसाद मिळत आला आहे. मालिकेतील कथानकेत होत जाणारे बदल तसेच कलाकारांच्या उत्कृष्ट अभिनयामुळे ही मालिका चाहत्यांच्या विशेष पसंतीस पडत आहे. मालिकेतील अरुंधती या पात्राने प्रेक्षकांच्या मनात घर केले आहे. या मालिकेतील प्रत्येक पात्रावर चाहते भरभरून प्रेम करत आहेत. अशातच या मालिकेतील जान्हवी या पात्राचेहे कौतुक होत आहे.
मालिकेत जान्हवी हे पात्र साकारणारी बालकलाकार मनू ही चाहत्यांच्या पसंतीस पडत आहे. प्रेक्षक तिच्या अभिनयाचे कौतुक करत असतानाचं स्वत: अरुंधती म्हणजेच अभिनेत्री मधुराणी प्रभूलकरदेखील तिच्या अभिनयाने भारावली आहे. त्यामुळे अभिनेत्रीने जान्हवीसाठी खास पोस्ट शेकर केली आहे. मधुराणीने तिच्या इन्स्टाग्राम अकाऊंटद्वारे जान्हवीबरोबरचे खास फोटो शेअर करत असे म्हटले आहे की, “मनू , अर्थात जान्हवी…काय सुंदर काम करते . आणि रोज आम्हाला थक्क करत असते. जेमतेम ७ वर्षांची चिमुरडी. ह्या वयात तिचा तिच्या कामावर असणारं लक्ष, निष्ठा ,प्रेम, संयम, चिकाटी हे सगळं अवाक करणारं आहे.”
यापुढे तिने असं म्हटलं आहे की, “मी नुसतं तिला बघूनच तिच्याकडून किती गोष्टी रोज शिकत असते. मला तिचं कौतुक वाटतंच पण खरं सांगायचं तर तिच्याप्रती एक प्रकारचा आदरही वाटतो. आणि ते वाटणं अतिशय गोड वाटतं. त्यामुळे ही गोड मुलगी आई कुठे काय करते मालिकेच्या टीममध्ये असणे हे आमचं भाग्य आहे.”
दरम्यान, या पोस्टवर अनेक चाहत्यांनीही “जान्हवी अत्यंत प्रतिभावान बालकलाकार आहे, तिचा दमदार अभिनय नेहमीच अवाक करतो. तुम्ही सगले तिला खूप सांभाळून घेता यासाठी धन्यवाद, ती खूप छान काम करते” अशा अनेक कमेंट्स करत त्या बालकलाकाराचे कौतुक केले आहे.
