‘दूर्वा’, ‘फुलपाखरु’ व ‘मन उडू उडू झालं’ अशा मालिकांमधून घराघरांत लोकप्रिय झालेली अभिनेत्री म्हणजे हृता दुर्गुळे. हृताने आजवर अनेक मराठी मालिका व चित्रपटांत काम केल्यानंतर ती आता हिंदीत पदार्पण करायला सज्ज झाली आहे. हृता ही लवकरच हिंदी वेब सीरिजमध्ये झळकणार आहे. ओटीटीवर प्रदर्शित होणाऱ्या ‘कमांडर करण सक्सेना’ या वेब सीरिजमधून ती प्रेक्षकांच्या भेटीला येणार आहे. काही दिवसांपूर्वीच हृताने या वेब सीरिजचा टीझर शेअर केला होता. त्यानंतर तिने या सीरिजबद्दल सोशल मीडियावर खास पोस्ट शेअर केली होती. या पोस्टद्वारे तिने तिचा आनंद व्यक्त केला होता.
हृताने तिच्या इन्स्टाग्राम अकाऊंटद्वारे काही खास फोटो शेअर केले होते. या पोस्टमध्ये तिने “माझे जीवन हे अनेक पहिल्या गोष्टींनी भरलेले आहे आणि त्याच पहिल्या गोष्टींमध्ये ही सीरिज येते. त्यामुळे ही सीरिज माझ्यासाठी एक उल्लेखनीय कामगिरी आहे. या सीरिजमध्ये पोलिस अधिकाऱ्याची भूमिका साकारताना माझा पहिलाच अनुभव आहे. तसेच ॲक्शन सीक्वेन्सचाही माझा पहिला अनुभव आणि या सर्वात महत्त्वाचे म्हणजे माझे हिंदी OTT जगात पदार्पण होत आहे. याशिवाय चांगली सुरुवात कुठली असू शकत नाही” असं म्हटलं.
अशातच या सीरिजमधील आणखी एक अभिनेता व हृताचा सहअभिनेता ऋतुराज फडकेनेही या सीरिजबद्दलची एक खास पोस्ट शेअर केली आहे. ऋतुराजने त्याच्या इन्स्टाग्राम हृताबरोबरचा खास फोटो शेअर करत असं म्हटलं आहे की, “मन उडू उडू झालं ही मालिका आम्ही जवळ जवळ एक वर्ष केली. पण त्यामध्ये आमच्या दोघांचा एक ही असा एकत्र सीन नव्हता. मात्र या हिंदी वेबसीरिजमध्ये एकत्र सीन आहे. या सीरिजमध्ये हृताने एकत्र कमाल काम केले आहे. मग ते अॅक्शन असो, भले मोठे हिंदीमधले डायलॉग असो. कमाल काम केलं आहे. ‘कमांडो करण सक्सेना’ ही वेबसिरीज बघायला तुम्हाला वेगळीच मज्जा येईल”.
दरम्यान, ‘मन उडू उडू झालं’ या मालिकेत ऋतुराज व हृता एकत्र झळकले होते. ऋतुराज फडकेने या मालिकेत मुख्य भूमिकेत असलेल्या इंद्राच्या भावाची भूमिका साकारली होती. या नकारात्मक भूमिकेला ऋतुराजने उत्तम न्याय दिला होता. या मालिकेनंतर आता ऋतुराज व हृता आगामी ‘कमांडर सक्सेना’ या सीरिजमध्ये झळकणार आहेत. नकारात्मक भूमिका असूनदेखील कार्तिकच्या माध्यमातून ऋतुराजला प्रेक्षकांचे प्रचंड प्रेम आणि प्रतिसाद मिळाला होता.