‘सातव्या मुलीची सातवी मुलगी’ या मालिकेतून अभिनेत्री तितीक्षा तावडे घराघरांत पोहोचली. आजवर तितीक्षाने या मालिकेतून प्रेक्षकांची मन जिंकली आहेत. या मालिकेमुळे तितीक्षाला खऱ्या अर्थाने लोकप्रियता मिळाली. काही दिवसांपूर्वीच तितीक्षा तिच्या लग्नसोहळ्यामुळे चर्चेत आलेली पाहायला मिळाली. तितीक्षाने अभिनेता सिद्धार्थ बोडकेसह लग्नगाठ बांधली. ६ फेब्रुवारी रोजी तितीक्षा व सिद्धार्थ यांचा अगदी शाही थाटामाटात विवाह सोहळा संपन्न झाला. दोघांच्या लग्नाची सोशल मीडियावर बरीच चर्चा रंगलेली पाहायला मिळाली. सिद्धार्थ व तितीक्षा यांनी डेस्टिनेशन वेडिंग करत त्यांचा विवाहसोहळा उरकला. (Titeeksha tawde and siddharth bodke)
लग्नानंतर तितीक्षाने लगेचच कामाला सुरुवात केली. त्यानंतर आता लग्नाला तीन महिने पूर्ण होताच तितीक्षा तिच्या माहेरी गेली आहे. लग्नानंतर ती नवऱ्यासह पहिल्यांदाच माहेरी गेली आहे. तितीक्षाच घर हे डोंबिवलीत आहे. तितीक्षा घरी पोहोचताच तिच्या आईने दोघांचं औक्षण करत त्यांचं स्वागत केलं. त्यांनतर त्यांनी त्यांच्या घरातल्या देवांचे दर्शन घेतले.
तितीक्षा व सिद्धार्थ ज्या दिवशी घरी गेले त्या दिवशी संकष्टी होती. त्यामुळे तिचे आई-बाबा दोघेही जेवण बनवताना दिसले. यावेळी तितीक्षाच्या आई-बाबांनी गोडाधोडाचे पदार्थ केले होते, मोदकही बनवण्यात आले होते. सगळ्यांनी मिळून पोटभर जेवण केलं. त्याच दिवशी आयपीएलची मॅच असल्याने तितीक्षा, सिद्धार्थ आणि तिचा भाऊ यांनी मिळून मॅच पाहिली. त्यानंतर तितीक्षाच्या आई-बाबांनी लग्नानंतर घरी पहिल्यांदाच औक्षण करत दोघांना भेटवस्तूही दिली.
दुसऱ्या दिवशी तितीक्षाच्या आईचा वाढदिवस होता. मात्र चित्रीकरणामुळे तिला येता येणार नव्हतं. त्यामुळे तितीक्षाने आईचा वाढदिवस आदल्या दिवशीच साजरा केला. यावेळी तितीक्षाच्या माहेरच्या घराची झलक पाहायला मिळाली. अत्यंत साधे राहणीमान यावेळी पाहायला मिळालं. त्यांच्या लिव्हींगरुममध्ये तितीक्षा व खुशबूच्या लहानपणीचे फोटोही लावलेले दिसले. कोणताही अवाढव्य खर्च न करता अत्यंत साधे असे तितीक्षाचे माहेरचे घर पाहणं साऱ्यांना भावलं.