मराठी नाटक, मालिका व चित्रपट अशा मनोरंजनाच्या तिन्ही माध्यमातून प्रेक्षकांचे मनोरंजन करणारा अभिनेता म्हणजे संकर्षण कऱ्हाडे, संकर्षण हा त्याच्या अभिनयाव्यतिरिक्त अनेक कारणांनी चर्चेत असतो. संकर्षणचे रंगभूमीवर सध्या ‘तू म्हणशील तसं’, ‘नियम व अटी लागू’ आणि ‘संकर्षण व्हाया स्पृहा’ ही तीन नाटकं सुरु आहेत. तो एक उत्तम लेखक, कवी व संवादकार असल्यामुळे त्याचे लिखाण व बोलणं ऐकणे हेदेखील त्याच्या चाहत्यांना भलतेच आवडत असते. संकर्षण हा त्याच्या अभिनयामुळे जितका चर्चेत असतो, तितकाच तो त्याच्या सोशल मीडियाद्वारेदेखील चर्चेत राहत असतो.
अशातच त्याने सोशल मीडियावर नुकतीच शेअर केलेली एक पोस्ट सर्वांचे लक्ष वेधून घेत आहे. संकर्षणने त्याच्या इन्स्टाग्रामवर एक फोटो पोस्ट केला आहे आणि या पोस्टद्वारे त्याने नाटकात बॅकस्टेजचे काम करणाऱ्याविषयी त्याच्या भावना व्यक्त केल्या आहेत. संकर्षणने त्याच्याबरोबर खास फोटो पोस्ट करत असं म्हटलं आहे की, “आज आमच्या ‘तू म्हणशील तसं’ आणि ‘नियम व अटी लागू’ या नाटकांमध्ये बॅकस्टेजचं काम करणारा अक्षय पवार त्याचा नवा संसार सुरु करून भेटायला आला. बायकोची ओळख करुन दिली आणि त्याच्या बायकोला म्हणाला “सोनाली, दादाला नमस्कार कर” आणि इतकं गोड वाटलं. नाटक हे तसं अनिश्चीततेचं माध्यम आहे. पण नेटाने, चिकाटिने , सातत्याने नाटक केलं तर नाटक खूप काही देतं”
यापुढे त्याने असं म्हटलं की, “आज बॅकस्टेज करणाऱ्या ह्या मुलाने आयुष्यातलं मोठं पाऊल नाटकाच्या जीवावर ऊचललं. संसार सुरू केला. म्हणून प्रत्येक प्रयोग महत्वाचा असतो, कारण त्या प्रत्येक प्रयोगावर एका कुटुंबाच्या घरी संसार सुरू असतो. असे अनेक संसार सुखी करण्यासाठी नाटक फार फार महत्वाचं आहे.” या फोटोला संकर्षणने नाटकातला संसार असं कॅप्शन देत दोघांना त्यांच्या नवीन लग्नानिमित्त शुभेच्छा दिल्या आहेत.
दरम्यान, संकर्षणचे रंगभूमीवर सध्या ‘नियम अटी लागू’, ‘तू म्हणशील तसं’ या नाटकांसह त्याचा ‘संकर्षण व्हाया स्पृहा’ हा कवितांचा कार्यक्रमही सुरू आहे. तसेच त्याच्या नाटकांना व कवितांच्या कार्यक्रमांना प्रेक्षकांचा चांगलाच प्रतिसादही मिळत आहे.
