आदिल खान दुर्रानी व राखी सावंत यांच्या सोशल मीडियावर बऱ्याच चर्चा रंगलेल्या पाहायला मिळाल्या. लग्न, घटस्फोट, आरोप-प्रत्यारोप या सगळ्यांमुळे ही जोडी विशेष चर्चेत राहिली. अशातच आता पुन्हा एकदा आदिल खान दुर्रानी चर्चेत आला आहे. अचानक समोर आलेल्या आदिल खानच्या लग्नाच्या बातमीने साऱ्यांना खूप मोठा धक्का बसला आहे. आदिल खान दुर्रानीने अभिनेत्री सोमी खानसह लग्नगाठ बांधली. आदिल व सोमी यांच्या लग्नाचे अनेक सुंदर फोटो इंस्टाग्रामवर त्यांनी शेअर केले आहेत, ज्यामध्ये दोघेही लग्नाचे विधी पूर्ण करताना दिसत आहेत. (Rakhi Sawant On Adil Khan Durrani Wedding)
आदिलने त्याच्या लग्नाचे फोटो शेअर केले असून ३ मार्च २०२४ रोजी त्याचे लग्न झाले आणि आता दोघेही पती-पत्नी असल्याचे म्हटले आहे. आदिल खान दुर्रानी व सोमी खानच्या लग्नाची बातमी समोर येताच आता राखीने यावर मौन सोडलं आहे. ‘टेली टॉक इंडिया’शी बोलताना राखी सावंतने आदिलच्या या लग्नावर प्रतिक्रिया दिली आहे. राखी म्हणाली, “हे धक्कादायक आहे, त्याने अजून मला घटस्फोट दिलेला नाही. आदिलने माझ्या आधी ५ ते ६ वेळा लग्न केले होते, त्या मुलींनीही घटस्फोट घेतला नव्हता, त्या सर्व अत्याचारानंतर पळून गेल्या आणि सर्वांनी माझ्याशी संपर्क साधला”.
राखी पुढे म्हणाली, “मला सोमीबद्दल जाणून आश्चर्य वाटले, आदिलने वर्षभरात मला खूप धमक्या दिल्या आहेत. आता तो तिच्याबरोबरही तेच करणार, त्याने माझे पैसे लुटले, मला रस्त्यावर आणले”, असं ती म्हणाली. सोशल मीडियावर नेटकऱ्यांनी आदिल व सोमीच्या लगाच्या फोटोंवर कमेंट्सचा वर्षाव केला आहे. नेटकऱ्यांनी म्हटलं आहे की, “आता खरा तांडव होणार आहे”. तर आणखी एका युजरने म्हटलं आहे की, “इतके घोटाळे केल्यानंतर कोणी लग्न कसे करु शकते?”.
आणखी वाचा – राखी सावंतच्या पूर्वाश्रमीचा पती आदिल खानच्या दुसऱ्या लग्नाचे फोटो व्हायरल, ‘या’ ठिकाणी पार पडला विवाह सोहळा
न्यूज १८च्या रिपोर्टनुसार, आदिल खान दुर्रानीने त्याच्या व सोमी खानच्या लग्नाबाबत भाष्य केलं आहे. तो म्हणाला, “हे माझे पहिले लग्न आहे. सध्या आम्ही बेंगळुरूमध्ये आहोत. आम्ही लवकरच दोघेही मुंबईला रवाना होणार आहेत. मी लवकरच सर्व काही माहिती देईन”. आदिल व सोमीने जयपूरमध्ये गुपचूप लग्न केल्याची बातमी आहे.