हिंदी मनोरंजन विश्वातून नुकतीच एक दु:खद बातमी समोर आली आहे. छोट्या पडद्यावरील लोकप्रिय अभिनेत्री डॉली सोहीचे निधन झाले आहे. अभिनेत्री गेल्या काही दिवसांपासून गर्भाशयाच्या मुखाच्या कर्करोगाशी लढा देत होती. मात्र तिच्या या लढ्याला अपयश आले असून तिची या लढ्याची झुंज अखेर अपयशी ठरली आहे. अशातच अभिनेत्रीची लहान बहीणीचेहे निधन झाल्याचे वृत्त समोर येत आहे. (Dolly Sohi Sister Amandeep Sohi Death)
डॉलीची बहीण अमनदीप हिनेदेखील डॉलीच्या निधनाच्या काही तास आधीच या जगाचा निरोप घेतला. अमनदीपला कावीळ झाली असल्याचे वृत्त समोर आले असून तिला यावर उपचार घेण्यासाठी रुग्णालयात दाखल करण्यात आले होते. मात्र तिच्या शरीरातील कावीळची गुंतागुंत ही अधिकच वाढत गेली. त्यामुळे तिची किडनी निकामी झाली आणि तिच्या शरीराने प्रतिसाद बंद केला. अखेर अमनदीपला या जगाचा निरोप घ्यावा लागला.
अमनदीप सोहीचे काल, गुरुवार ७ मार्च रोजी निधन झाले. त्याने ‘ETimes’च्या वृत्तानुसार, तिचा भाऊ मनू सोहीने अमनदीपच्या निधनाचे वृत्त देताना असं म्हटलं की, “हो, हे खरं आहे. अमनदीप आता आपल्यात नाही. तिला कावीळ झाली होती आणि कावीळमुळे तिची किडनी निकामी झाली. त्यामुळे तिचे निधन झाले. पण डॉक्टरांना तिच्याबद्दल सविस्तर विचारण्यासाठी आम्ही सध्या त्या स्थितीत नाही.”
डॉली सोही व अमनदीप सोही या दोन बहीणींच्या आकस्मिक निधनाचे वृत्त मन हेलावून टाकणारे आहे. अभिनेत्रीच्या कुटुंबासाठी हा काळ खूप कठीण आहे. अवघ्या काही तासांतच त्यांच्या दोन्ही मुलींचा मृत्यू झाला आहे. त्यामुळे अभिनेत्रींच्या कुटुंबावर दुःखाचा डोंगर कोसळला आहे. तसेच दोन्ही अभिनेत्रीच्या निधनाने कुटुंबासह मनोरंजन विश्वालादेखील मोठा धक्का बसला आहे.
अमनदीप सोही हीदेखील एक अभिनेत्री आहे. अमनदीप डॉलीइतकी लोकप्रिय नसली तरी, मनोरंजन उद्योगात अमनदीपचे स्वतःची वेगळी ओळख आहे. तिने अनेक टीव्ही मालिकांमध्ये अभिनय करत प्रेक्षकांचे मनोरंजन केले आहे. दरम्यान, मिळालेल्या माहितीनुसार, दोन्ही बहिणींवर आज दुपारी नवी मुंबईत अंत्यसंस्कार करण्यात येणार आहेत.
