रामजन्मभूमी अयोध्यातील बहुप्रतीक्षित ऐतिहासिक श्री राम मंदिर अवघ्या काही दिवसांत भक्तांसाठी खुले होणार आहे. या भव्य दिवसाची सारे भक्त आतुरतेने वाट पाहत आहेत. हा सोहळा २२ जानेवारी २०२४ रोजी संपन्न होणार आहे. मंदिर परिसरात राम लल्लाच्या मुर्तीच्या प्राण प्रतिष्ठेच्या भव्य समारंभाला माननीय पंतप्रधान नरेंद्र मोदी उपस्थित राहणार आहेत. राम मंदिर प्राणप्रतिष्ठा सोहळ्याची तयारी जोरात सुरु आहे. राम मंदिराबाबत लोकांमध्ये प्रचंड उत्साह बघायला मिळत आहे. (Rupali Bhosale On Shri Ram Mandir)
१६ जानेवारीला भव्य उद्घाटनापूर्वी अनेक कार्यक्रम सुरु होणार असल्याचं समोर आलं आहे. ४००० साधू-संतांसह देशाच्या कानाकोपऱ्यातून सुमारे ७००० पाहुण्यांनाही या शुभ सोहळ्यासाठी आमंत्रणे पाठवण्यात आली आहेत. या नेत्रदिपक कार्यक्रमात अनेक दिग्गज सेलिब्रिटी उपस्थित राहणार आहेत. दरम्यानच्या काळात अनेक सेलिब्रेटींना त्यांना मिळालेल्या निमंत्रणाची झलक आपल्या चाहत्यांसह सोशल मीडियाच्या माध्यमातून शेअर केली आहे.
अशातच एका मराठमोळ्या व लोकप्रिय अभिनेत्रीलाही श्री राम मंदिरच्या सोहळ्यसाठी आमंत्रित करण्यात आलं आहे. ‘आई कुठे काय करते’ फेम अभिनेत्री रुपाली भोसले हिला या सोहळ्याची खास निमंत्रण पत्रिका आली आहे. अभिनेत्रीने तिच्या इन्स्टाग्राम अकाउंटवरुन याबाबतची पोस्ट शेअर केली आहे. “जय श्री राम. अक्षत निमंत्रण” असं कॅप्शन देत तिने निमंत्रण पत्रिकेची झलक शेअर केली आहे. तिच्या या पोस्टवर अनेकांनी कमेंट करत ‘जय श्री राम’ असं लिहिलं आहे.
रणबीर कपूर, आलिया भट्ट, अमिताभ बच्चन, माधुरी दीक्षित, अनुपम खेर, अक्षय कुमार, सनी देओल, अजय देवगण, प्रभास, आयुष्मान खुराना, टायगर श्रॉफ, यश तसेच प्रसिद्ध दिग्दर्शक राजकुमार हिरानी, संजय लीला यांसारखे सेलिब्रिटी या कार्यक्रमाला उपस्थित राहणार आहेत. याशिवाय आणखीही मराठमोळ्या कलाकारांना या सोहळ्याच्या आमंत्रण आलेलं पाहायला मिळत आहे.
