मुंबईत स्वत:चं घर असावं असं प्रत्येकाला वाटत असतं आणि यासाठी प्रत्येकजण मेहनत घेत असतो. अभिनेत्री, गायिका केतकी माटेगावकर हीचंदेखील मुंबईत स्वत:चं घर घेण्याचे स्वप्न होतं आणि तिचं हे स्वप्न अखेर सत्यात उतरले आहे. अभिनेत्रीने नुकतच तिच्या स्वत:च्या हिंमतीवर मुंबईत घर घेतलं असून नुकतीच ती तिच्या नवीन घरात शिफ्ट झाली आहे. ‘इट्स मज्जा’च्या ‘माझ्या घराची गोष्ट’मध्ये केतकीने तिच्या नवीन घराची खास झलक दाखवली. यावेळी तिने तिच्या घराचे काही किस्से प्रेक्षकांना सांगितले.
उंच आणि शांत ठिकाणी घर असावं या हेतूने केतकीने मुंबईत १९ व्या मजल्यावर तिचं स्वत:चं घर घेतलं आहे. या घराच्या इंटिरिअरसाठी तिने पांढऱ्या सांगायची थीम वापरली आहे. त्याचबरोबर या थीमला साजेशी रंगसंगती वापरत तिने तिच्या घराला रंगकाम केले आहे. ती निसर्गप्रेमी आहे. तिला झाडं, पानं, फुलं खूप आवडतात आणि त्यामुळेच घरातील हॉलच्या भिंतीला तशाच प्रकारचं वॉलपेपर लावलं आहे. त्याचबरोबर केतकी ही संगीतप्रेमी आहे, त्यामुळे तिच्या घरी वीणा, तंबोरा, पियानो सारखी अनेक वाद्य आहेत. या वाद्यांचा योग्य वापर करत तिने घरचे इंटिरिअर साकारले आहे. तिच्या घरी एक मोठा पिआनो असून तिने तो हॉलमध्ये आकर्षक पद्धतीने ठेवला आहे.
तसेच घरात काही इतर गोष्टींची योग्य पद्धतीने सजावट करत घराला आकर्षक रूप दिले आहे. केतकी तिच्या घराला ‘हॅप्पी प्लेस’ अर्थात ‘आनंदी जागा’ असं म्हणते. तिच्या घराच्या दारावर एक हटके पाटी देखील आहे. ज्यावर ‘house is not a home without a beagle’ असं लिहिलं आहे. त्याचबरोबर तिला कुत्र्यांची विशेष आवड असल्याने तिने तिच्या पेटसाठी घरात खास जागा केली आहे.
आणखी वाचा – केतकी माटेगांवकरला तिच्या मुंबईतील घरी एकटं राहण्यास आई-वडिलांचा होता विरोध, म्हणाली, “आम्हाला सोडून…”
दरम्यान अनेकदा कामानिमित्त केतकीला मुंबईला यावे लागत होते. तेव्हा त्यांनी गोरेगावला घर घेतलं होतं. तो विकून २ बीएचकेचा फ्लॅट घेण्याचा तिच्या आईचा विचार होता. मग १८ व्या मजल्यावर केतकीच्या बाबांनी फ्लॅट बुक केल्यानंतर तिथेच १९ मजल्यावर केतकीने तिच्या हिमतीवर स्वतःचे घर घेतले. दरम्यान, २०२२ मध्ये हे नवीन घर घेताच काही दिवसांनी तिला ‘मीरा’ हा चित्रपट ऑफर झाला. त्याचबरोबर काही नवीन कामेदेखील तिला मिळाले. त्यामुळे या हे नवीन घर तिच्यासाठी भाग्यवान असल्याची भावना तिने व्यक्त केली.
