काही दिवसांपासून सिनेसृष्टीत ‘अ‍ॅनिमल’ चित्रपटाची चांगलीच चर्चा रंगली होती. ‘अ‍ॅनिमल’ या चित्रपटामुळे रणबीर कपूरही चर्चेत राहिला. या चित्रपटातील रणबीर कपूरचं रौद्र रूप आता समोर आलं आहे. कारण रणबीर कपूरच्या ‘अ‍ॅनिमल’ चित्रपटाचा ट्रेलर नुकताच प्रदर्शित झाला आहे. ‘अ‍ॅनिमल’ या चित्रपटाचं काही दिवसांपासून जोरदार प्रमोशन सुरु आहे. अशातच चित्रपटाच्या टीझरने चित्रपटाबाबतची उत्सुकता वाढवली यानंतर आता चित्रपटाच्या ट्रेलरने ही उत्सुकता अधिक ताणली आहे. (Animal Trailer)
आपल्या वडिलांनाच आपला आदर्श मानणारा, त्यांच्यासाठी कोणत्याही थराला जाणारा एका गुन्हेगार मुलांचं त्याच्या वडिलांशी असलेलं नातं हे या चित्रपटातून अधोरेखित करण्यात आलं असल्याचं ट्रेलरवरून कळतंय. संदीप रेड्डी वंगा यांच्या चित्रपटाचा ट्रेलर आज प्रदर्शित झाला असून तो केलेल्या कल्पनेइतका तीव्र आहे. ट्रेलरमध्ये रणबीर कपूरचे वडील बलबीर(अनिल कपूर यांनी साकारलेले पात्र) यांच्याबरोबरचे त्याचे अस्वस्थ नाते आणि ते बदलणारे नाते दाखविण्यात आलं आहे. रणबीरचं खलनायकी पात्र हे त्याच्यात त्याच्या घरापासूनच आलं आहे. कारण त्याच्या कुटुंबाचं गुन्हेगारी विश्वाशी काहीतरी कनेक्शन असल्याचं ट्रेलरवरुन स्पष्ट होत आहे. चित्रपटात हळव्या नात्यासह जबरदस्त ऍक्शन, प्रचंड हाणामारी, हिंसा पाहायला मिळणार असल्याचंही दिसतंय.
चित्रपटात रश्मिका मंदाना रणबीर कपूरच्या प्रेयसीच्या भूमिकेत पाहायला मिळणार आहे. ती या चित्रपटात गीतांजली ही भूमिका साकारणार आहे. चित्रपटात रश्मिकाचं पात्रही फार महत्त्वाचं ठरणार असल्याचं दिसत आहे. शिवाय चित्रपटातील बॉबी देओलची भूमिकाही हिंसक असलेली पाहायला मिळतेय. ट्रेलरच्या अगदी शेवटी बॉबी व रणबीरची ऍक्शन सीन लक्षवेधी ठरतोय. त्यामुळे ऍक्शनपट ‘अ‍ॅनिमल’ चित्रपटासाठी प्रेक्षक उत्सुक असल्याचं पाहायला मिळतंय. कमी वेळात या ट्रेलरला प्रेक्षकांकडून भरभरुन प्रतिसाद मिळत आहे.
यापूर्वी, हा चित्रपट ११ ऑगस्ट रोजी प्रदर्शित होणार होता मात्र निर्मात्यांनी चित्रपटाच्या प्रदर्शनाची तारीख यावर्षी डिसेंबरमध्ये हलवली. दिग्दर्शक संदीप रेड्डी वंगा दिग्दर्शित, रणबीर कपूर अभिनित ‘अ‍ॅनिमल’ या चित्रपटात रश्मिका मंदाना, अनिल कपूर, बॉबी देओल, तृप्ती डिमरी यांच्याही प्रमुख भूमिका आहेत. हा चित्रपट येत्या १ डिसेंबरला देशभरात प्रदर्शित होणार आहे.
