‘सोनी मराठी’ वाहिनीवरील ‘महाराष्ट्राची हास्यजत्रा’ शोमधून घराघरांत पोहोचलेली अभिनेत्री म्हणजे प्रियदर्शिनी इंदलकर. प्रियदर्शिनी सोशल मीडियावर नेहमी सक्रिय असते. कामाव्यतिरिक्त ती आपल्या खासगी आयुष्यातील गोष्टी सोशल मीडियावर शेअर करत असते. अभिनेता ओंकार राऊतच्या वाढदिवसानिमित्तही तिने दिलेल्या शुभेच्छांची पोस्ट सोशल मीडियावर विशेष चर्चेचा विषय ठरली. अशातच प्रियदर्शिनीने शेअर केलेली आणखी एक सुंदर पोस्ट नेटकऱ्यांचं लक्ष वेधून घेत आहे. कारणही तसं खास आहे.(Actress Priyadarshini Indalkar Post)
प्रियदर्शिनीला सोशल मीडियाद्वारे व्यक्त होणं आवडतं. आताही तिने तिच्या वडिलांच्या वाढदिवसानिमित्त सोशल मीडियाद्वारे पोस्ट शेअर केली आहे. प्रियदर्शिनीने तिच्या वडिलांबरोबरचा फोटो शेअर केला आहे. विशेष म्हणजे तिने वडिलांमुळे मिळालेल्या विनोदीबुद्धीसाठी त्यांचे आभार मानले आहेत. तसेच तिने तिच्या आणि वडिलांच्या नात्यातील गोड क्षण सांगितले आहेत.
वाचा – काय आहे प्रियदर्शिनीने केलेली पोस्ट (Actress Priyadarshini Indalkar Post)
प्रियदर्शिनी म्हणाली, “जेव्हा तुम्ही आनंदाने मला सांगत असता की, कसं कोणीतरी तुम्हाला प्रियदर्शिनीचे वडील म्हणून ओळखलं, तेव्हा तुमच्यापेक्षा जास्त आनंद मला होतो. बापाचा चेहरा आपल्यामुळे खुलतो, हा आनंद वेगळाच आहे”. वडिलांबाबत बोलताना प्रियदर्शिनी अगदी भारावून गेली होती.
ती पुढे म्हणाली, “आपल्या फोनशिवाय दिवस संपत नाही. छोट्या छोट्या गोष्टी तुम्हाला सांगणं मला फार आवडतं आणि त्या ऐकण्यासाठी तुम्हीसुद्धा तितकेच उत्सुक असता. अशीच बडबड करत राहु, एकमेकांना हसवत राहु. मी तुमचे विनोद सुधारत जाईन. तुम्ही मला सूचना करत रहा. तुम्हाला अभिमान वाटेल असं काम मी करत राहीन. तुम्ही मला भेटण्याची कारणं शोधत रहा. मला तुमची खूप आठवण येते. पण मला हेही माहित आहे की, तुम्हाला माझी आठवण जास्त येते. वाढदिवसाच्या प्रेमळ शुभेच्छा वडिल!”. प्रियदर्शिनीची ही भावुक पोस्ट पाहून तिचे चाहतेही भारावले आहेत.
