झी मराठी वाहिनी वरील लोकप्रिय कॉमेडी शो म्हणजे ‘चला हवा येऊ द्या.’ या लोकप्रिय शोने गेली अनेक वर्षे प्रेक्षकांचं मनोरंजन केले. ‘चला हवा येऊ द्या’ या शोचा पहिला एपिसोड २०१४ मध्ये प्रेक्षकांच्या भेटीला आला होता. त्यामुळे या कार्यक्रमाचा मोठा प्रेक्षकवर्ग आहे. दरम्यान नुकतंच या शो ने प्रेक्षकांचा निरोप घेतला होता. टीआरपीच्या कारणांमुळे हा शो बंद झाल्याचे म्हटले गेले. त्यामुळे चाहते नाराज झाले होते. मात्र छोट्याश्या विश्रांतीनंतर हा शो पुन्हा एकदा प्रेक्षकांच्या मनोरंजनासाठी सज्ज झाला आहे. यासंदर्भात नुकताच एक व्हिडीओ समोर आला आहे आणि सध्या सोशल मीडियावर सर्वत्र या व्हिडीओची चांगलीच चर्चा सुरू आहे. (Dr. Nilesh Sabale Shared Video On Instagram)
डॉ. निलेश साबळे हे सोशल मीडियावर बऱ्यापैकी सक्रिय असतात. अशातच त्यांनी या शोसंदर्भात एक व्हिडीओ त्यांच्या इन्स्टाग्राम अकाऊंटद्वारे शेअर केला आहे. या व्हिडीओद्वारे त्यांनी ‘चला हवा येऊ द्या’ हा शो पुन्हा एकदा प्रेक्षकांच्या भेटीला येत असल्याची माहिती दिली आहे. या व्हिडीओत त्यांचसह अभिनेते भाऊ कदम हेदेखील आहेत. या व्हिडीओत भाऊ “मी पुन्हा येतोय, मी पुन्हा येतोय.. ‘चला हवा येऊ द्या’ आता सोमवार ते शनिवार” असं म्हणत आहेत. यापुढे भाऊंना दुजोरा देत निलेश असं म्हणतो, “बरोबर ऐकताय तुम्ही, चला हवा येऊ द्या आता फक्त सोमवार, मंगळवारीच नाही, तर सोमवार ते शनिवार म्हणजेच संपूर्ण आठवडाभर असणार नवेकोरे एपिसोड्स. तेव्हा पाहायला विसरू नका ‘चला हवा येऊ द्या’ सोमवार ते शनिवार” असं म्हणतो.
सध्या हा व्हिडीओ सोशल मीडियावर चांगलाच व्हायरल होत आहे. हा शो बंद झाल्याचे कळले तेव्हा शोच्या चाहत्यांनी नाराजी व्यक्त केली होती. मात्र हा शो आता पुन्हा एकदा टीव्हीवर येत असल्याने चाहत्यांना आनंदाचा धक्का बसला आहे. तसेच शो च्या पुनरागमनाने चाहते चांगलेच खुश झाले असून या शो ची ते पुन्हा एकदा आतुरतेने वाट बघत आहेत हे नक्की.
या शोच्या माध्यमातून डॉ. निलेश साबळे, भाऊ कदम (भालचंद्र कदम), सागर कारंडे, श्रेया बुगडे, कुशल बद्रिके, भारत गणेशपुरे, स्नेहल शिदम, अंकुर वाढवे यांसारखे अनेक विनोदवीर घराघरांत पोहोचले. या कलाकारांना खूप लोकप्रियता मिळाली. दरम्यान, ‘चला हवा येऊ द्या’च्या पुनरागमनामुळे हे सगळे विनोदवीर पुन्हा एकदा प्रेक्षकांना खळखळून हसवायला सज्ज झाले आहेत.
