Bigg Boss Marathi 6 Nomination Task : ‘बिग बॉस मराठी’च्या सहाव्या सीझनमधील पहिलं नॉमिनेशन कार्य नुकतंच पार पडलं असून, यावेळी बिग बॉसने दिलेल्या मोठ्या ट्विस्टमुळे घरातील समीकरणं पूर्णपणे बदलली आहेत. ‘पतंग’ या संकल्पनेवर आधारित या टास्कमध्ये कोणाचा पतंग कोण कापणार, याकडे सगळ्यांचं लक्ष लागून राहिलं होतं. नॉमिनेशन टास्क सुरू होण्यापूर्वीच ग्रँड प्रीमियरला शॉर्टकट दरवाजा निवडलेल्या सदस्यांना देण्यात आलेल्या ‘पॉवर की’चा प्रभाव दिसून आला. पॉवर की असलेल्या सदस्यांना बिग बॉसने पॉवर चेंबरमध्ये जोडीने बोलावून महत्त्वाचे निर्णय घ्यायला लावले. सोनाली–रुचिता, करण–प्राजक्ता आणि दिपाली–तन्वी अशा जोड्यांमधून टास्क पार पडला.
या टास्कमध्ये करणने रुचिताला तिची पॉवर की परत देण्यास नकार दिल्यामुळे रुचिता थेट घराबाहेर होण्यासाठी नॉमिनेट झाली. दिपाली आणि तन्वी यांच्यातील टास्कमध्ये पहिला बझर तन्वीने वाजवल्याने ती कॅप्टन पदाची उमेदवार ठरली, तर दिपाली नॉमिनेशनमध्ये गेली. रुचिता बाद झाल्यामुळे सोनालीलाही कॅप्टन पदाच्या शर्यतीत थेट संधी मिळाली. दुसरीकडे, प्राजक्ता आणि करण यांच्यातील निर्णयात प्राजक्ता कॅप्टन पदाची दावेदार ठरली, तर करण घराबाहेर होण्यासाठी नॉमिनेट झाला.
आणखी वाचा – “माझा गळा का दाबतोय…” पहिल्या कॅप्टन्सी टास्कमध्ये तुफान राडा, विशाल–ओमकारमध्ये हाणामारी; वादाने घरात गोंधळ
यानंतर उर्वरित सदस्यांसाठी ‘पतंग टास्क’ खेळवण्यात आला. या टास्कमध्ये कॅप्टन पदाच्या दावेदार असलेल्या तन्वी, सोनाली आणि प्राजक्ता यांना प्रत्येकी दोन सदस्य नॉमिनेट करण्याचा अधिकार देण्यात आला. या निर्णयांनुसार सागर, दिव्या, रोशन, राधा, प्रभू आणि अनुश्री हे सदस्य नॉमिनेशनमध्ये गेले. यासोबतच आधीच नॉमिनेट झालेले दिपाली, करण आणि रुचिता यांचा समावेश झाल्याने पहिल्याच आठवड्यात एकूण नऊ सदस्य घराबाहेर होण्याच्या प्रक्रियेत आले आहेत. यामुळे ‘बिग बॉस मराठी ६’च्या घरात पहिल्याच आठवड्यात मोठी उलथापालथ झाली आहे…. आता या नऊ जणांपैकी नेमकं कोण घराबाहेर जाणार?, याची उत्सुकता प्रेक्षकांमध्ये दिसून आली आहे.
