गेले काही दिवस छोट्या पडद्यावरील एका पुरस्कार सोहळ्याची सर्वत्र जोरदार चर्चा सुरु असल्याचे पाहायला मिळत आहे आणि तो पुरस्कार सोहळा म्हणजे ‘स्टार प्रवाह पुरस्कार सोहळा २०२४’. स्टार प्रवाह वाहिनी नेहमीच दर्जेदार मालिका प्रेक्षकांसाठी घेऊन येत असते. त्यामुळे या वाहिनीचे प्रेक्षक वाहिनीच्या या खास पुरस्कार सोहळ्यासाठी कायम उत्सुक असतात. या पुरस्कार सोहळ्यात कोणती मालिका बाजी मारणार?, सर्वोत्कृष्ट जोडी कोण ठरणार?, सर्वोत्कृष्ट अभिनेता, अभिनेत्री पुरस्कार कोणी जिंकणार? यासाठी प्रेक्षकांमध्ये कायमच उत्सुकता असते.
अशातच काल (१७ जानेवारी) नुकताच हा पुरस्कार सोहळा पार पडला. यामध्ये ‘ठरलं तर मग’ या मालिकेची चांगलीच हवा पाहायला मिळाली. ‘महाराष्ट्राची महामालिका’, ‘सर्वोत्कृष्ट परिवार’ आणि ‘सर्वोत्कृष्ट जोडी’ असे पुरस्कार जिंकले आहेत. गेल्या वर्षभरापासून स्टार प्रवाहवर ‘ठरलं तर मग’ ही मालिका टीआरपीच्या शर्यतीत आघाडीवर आहे. मालिकेची लोकप्रियता आणि प्रेक्षकांनी दिलेल्या मतांच्या आधारे यंदाच्या ‘स्टार प्रवाह महामालिका’ या पुरस्कारावर ‘ठरलं तर मग’ने नाव कोरलं आहे.
तर ‘सर्वोत्कृष्ट अनुरूप जोडी’ हा पुरस्कारही या मालिकेच्या जोडीला मिळाला आहे. सायली-अर्जुन म्हणजेच अभिनेत्री जुई गडकरी व अभिनेता अमित भानुशालीला मिळाला आहे. यानिमित्त अमितने त्याच्या इन्स्टाग्रामवर एक खास फोटो शेअर करत त्याच्या भावना व्यक्त केल्या आहेत. तसेच या पुरस्कारासाठी त्याने आपली बायकोचे आभार मानले आहेत. “माझे अभिनेता होण्याचे स्वप्न पूर्ण होण्यासाठी तू मला कायम पाठिंबा आणि प्रोत्साहन दिला आहेस” असं म्हणत त्याने त्याच्या भावना व्यक्त केल्या आहेत.
दरम्यान, अमितने त्याच्या बायकोला किस करतानाचा फोटो शेअर केला आहे. या फोटोमध्ये दोघांचा रोमॅंटिक अंदाज पाहायला मिळत आहे. तसेच त्याने शेअर केलेल्या फोटोवर चाहते मंडळींनीही त्याला शुभेच्छा दिल्या आहेत. “अभिनंदन, दोघेही खूप सुंदर दिसत आहात, तू खूप भारी दिसत आहेस, हा पुरस्कार तुलाच मिळायला पाहिजे होता” अशा अनेक कमेंट्सद्वारे चाहत्यांनी अभिनेत्याचे कौतुकही केले आहे.
