गीतकार जावेद अख्तर यांनी आजवर त्यांच्या गीतांनी प्रेक्षकांची मन जिंकली आहेत. जावेद अख्तर नेहमीच त्यांच्या व्यावसायिक व वैयक्तिक आयुष्यामुळे चर्चेत असतात. जावेद अख्तर यांनी दोनदा लग्न केले आहे. त्यांची पहिली पत्नी हनी इराणी आहे, जिच्याशी त्यांचा काही वर्षांपूर्वी घटस्फोट झाला होता. त्या फरहान अख्तर व झोया अख्तर यांची आई आहे. एका संभाषणात जावेद अख्तर यांनी त्याच्या पहिल्या पत्नीबरोबरच्या नात्याबद्दल सांगितले, त्यांच्या पहिल्या पत्नीबरोबर त्यांचे मैत्रीपूर्व संबंध आहेत. जावेद अख्तरप्रमाणेच हनी इराणीनेही अनेक चित्रपटांच्या स्क्रिप्ट लिहिल्या आहेत. (Javed Akhtar On First Wife)
जावेद अख्तर यांनी ‘मोजो स्टोरी’ला दिलेल्या मुलाखतीत सांगितले की, जर ते गंभीर व्यक्ती असते किंवा दारूच्या व्यसनाचा बळी गेले नसते तर हनी इराणीबरोबरचे त्यांचे वैवाहिक जीवन संपुष्टात आले नसते. ते म्हणाले, “मला खात्री आहे की जर मी अधिक जबाबदार असतो तर कथा वेगळी असती. दारूचे व्यसन हे देखील या अयशस्वी संबंधाचे कारण होते. ती एक अद्भुत व्यक्ती आहे. मला तिच्याबद्दल खूप आदर आहे. त्यामुळेच आजही आम्ही चांगले मित्र आहोत”.
त्यांची नात शाक्य अख्तरच्या पदवीदान समारंभाला जावेद व हनी इराणी उपस्थित होते. दोघांनी एकत्र काढलेले फोटोही सोशल मीडियावर व्हायरल झाले. या फोटोत शबाना आझमीही दिसल्या होत्या. जावेद व हनी यांचा विवाह १९७२मध्ये झाला होता. दोघांना दोन मुले असून त्यांची नावे फरहान अख्तर व झोया अख्तर आहेत. दोघेही चित्रपटसृष्टीतील प्रसिद्ध नाव आहेत. १९८४मध्ये जावेद व हनी यांचा घटस्फोट झाला, त्यानंतर त्यांनी शबाना आझमी यांच्याशी लग्न केले.
जावेद अख्तर यांनी दारू सोडण्याचा निर्णय घेतला आणि तेव्हापासून त्यांनी एक थेंबही दारू प्यायली नाही. त्यांच्या कामाबद्दल बोलायचे तर जावेद यांनी राजकुमार हिरानी यांच्या ‘डंकी’ चित्रपटासाठी ‘निकले दी कभी हम घर से’ हे गाणे लिहिले होते. हे गाणे शाहरुख खान व तापसी पन्नूवर चित्रित करण्यात आले आहे, तर हे गाणे सोनू निगमने गायले आहे आणि प्रीतमने संगीत दिले आहे.
