reshma shinde vat purnima : आज सर्वत्र वटपौर्णिमेचा सण महिलावर्ग साजरा करताना दिसत आहेत. ज्येष्ठ महिन्याच्या पौर्णिमेला वटपौर्णिमेचा सण साजरा केला जातो. नवऱ्याच्या दीर्घायुष्यासाठी सुवासिनी हे व्रत करतात. तर मराठी सिनेविश्वातील नवीन लग्न झालेल्या अभिनेत्रीसुद्धा वटपौर्णिमेचं व्रत आवर्जून करताना दिसतात. कामाच्या, शूटिंगच्या वेळातून वेळ काढत या अभिनेत्री आपल्या आयुष्यभराच्या साथीदारासाठी हे वटपौर्णिमेचे व्रत करतात. हल्ली अनेक अभिनेत्री लग्नबंधनात अडकल्या. यांत मालिकाविश्वातील अभिनेत्री रेश्मा शिंदे हिचं नाव आवर्जून घेतलं जातं. रेश्मा शिंदेने २९ नोव्हेंबर २०२४ रोजी लग्न केले. लग्नाचे फोटो आणि व्हिडीओ अभिनेत्रीनं शेअर करत ही आनंदाची बातमी चाहत्यांसह शेअर करत सुखद धक्का दिला.
अभिनेत्री रेश्मा शिंदेनेही लग्नानंतरची तिची पहिली वटपौर्णिमा अगदी थाटामाटात साजरी केली. वटपौर्णिमेचे अनेक फोटो, व्हिडीओ सोशल मीडियावर शेअर केले आहेत. अभिनेत्रीने राहत्या घरीच तिच्या पतीसह वटपौर्णिमा साजरी केली आहे. ल्गनांतरचा प्रत्येक सण रेश्मा हौसेने साजरा करताना दिसते. रेश्माचा नवरा हा साऊथ इंडियन असूनही त्याने पत्नीला साथ देत अगदी मराठमोळ्या अंदाजात ही वटपौर्णिमा साजरी केली आहे.
रेश्माने शेअर केलेल्या वटपौर्णिमा स्पेशल व्हिडीओमध्ये पवन, रेश्माच्या गळयात मंगळसूत्र घालताना दिसत आहे. त्यानंतर रेश्मा नाकात नथ घालताना दिसतेय. रेश्माने वटपौर्णिमेसाठी खास पोपटी रंगाची पैठणी नेसली आहे. व्हिडीओमध्ये रेश्माचा नवरा तिच्या साडीच्या निऱ्या सरळ करताना दिसतोय. आणि त्यांनतर रेश्मा व पवन दोघे मिळून वटसावित्रीची पूजा करत आहेत. रेश्माने हा व्हिडीओ शेअर करत, “माझी पहिली वटपौर्णिमा” असं कॅप्शन दिलं आहे. अभिनेत्रीच्या या पोस्टवर चाहत्यांनी आणि कलाकारांनी लाईक्स आणि कमेंट्सचा वर्षाव केला आहे.
२९ नोव्हेंबर २०२४ शुक्रवार रोजी रेश्मा विवाहबंधनात अडकली. कुटुंबिय आणि जवळच्या मित्र मैत्रिणींच्या उपस्थितीत हा सोहळा पार पडला. रेश्माच्या पतीचं नाव पवन असं आहे. पवन आयटी इंडस्ट्रीत काम करतो. गेल्या सात ते आठ वर्षांपासून तो युकेत होता. पण आता तो भारतात परतला आहे.
