‘दुनियादारी’, ‘प्यारवाली लव्हस्टोरी’, ‘तू ही रे’, या गाजलेल्या चित्रपटांतून अभिनेता स्वप्निल जोशी व सई ताम्हणकर ही लोकप्रिय जोडी प्रेक्षकांच्या भेटीला आली आहे. तसेच ‘दुनियादारी’, ‘क्लासमेट्स व धुरळा या चित्रपटातून अभिनेता अंकुश चौधरी व सई ताम्हणकर या जोडीने प्रेक्षकांचे मनोरंजन केले आहे. तर ‘दुनियादारी’ या चित्रपटात स्वप्निल, अंकुश व सई हे त्रिकुट पाहायला मिळाले होते.
‘दुनियादारी’ या चित्रपटाला नुकतीच दहा वर्षे पूर्ण झाली आहेत. अशातच आता ‘दुनियादारी’ या गाजलेल्या चित्रपटानंतर स्वप्निल जोशी, सई ताम्हणकर, अंकुश चौधरी व दिग्दर्शक संजय जाधव ही टीम पुन्हा एकदा प्रेक्षकांच्या भेटीला येणार आहे. अंकुश चौधरी, सई ताम्हणकर, स्वप्निल जोशी व संजय जाधव यांच्या यांच्या आगामी नवीन चित्रपटाबद्दल नुकतीच माहिती देण्यात आली असून या तिघांना पुन्हा एकदा चित्रपटात एकत्र पाहण्यासाठी प्रेक्षक खूपच उत्सुक आहेत.
या चित्रपटाचे नाव आणि अन्य बाबी अद्याप गुलदस्त्यात असल्या तरी अंकुश चौधरी, सई ताम्हणकर, स्वप्निल जोशी व संजय जाधव यांची टीम पाहूनच प्रेक्षकांना त्यांच्या नवीन चित्रपटाची सर्वांना उत्सुकता लागून राहिली आहे. तसेच ही टीम आता पुन्हा कोणता नवीन चित्रपट घेऊन येणार? या चित्रपटाचे नाव काय असणार? यात प्रेक्षकांना काय पाहायला मिळणार? याची सर्वजण वाट पाहत आहेत.
या चित्रपटाची पूर्वतयारी आता सुरु झाली असून तब्बल ११ वर्षांनंतर ही टीम प्रेक्षकांच्या भेटीस येणार आहे. या नव्या चित्रपटाचे दिग्दर्शक संजय जाधव आहेत. तर स्वाती खोपकर, अमेय खोपकर, नानूभाई जयसिंघानी व निनाद बत्तीन हे निर्माते आहेत.
दरम्यान, निर्माते अमेय खोपकर यांनी “अंकुश, सई, स्वप्निल यांसारखे कमाल कलाकार या चित्रपटात प्रमुख भूमिका साकारणार आहेत. या टीमबरोबर माझे जुने ऋणानुबंध आहेत आणि ही टीम एकत्र आणण्याचा योग निनाद बत्तीन यांनी जुळवून आणला असून ही टीम पुन्हा एकत्र आल्यावर मोठा गेम तर नक्कीच होणार आणि चित्रपट गाजणारच” अशा भावना व्यक्त केल्या आहेत.