कन्नड चित्रपटसृष्टीमधील सुप्रसिद्ध अभिनेता विजय राघवेंद्रची पत्नी स्पंदनाचं ७ ऑगस्टला निधन झालं. स्पंदना परदेशात कुटुंबियांसह सुट्टी एण्जॉय करण्यासाठी गेली होती. दरम्यान खरेदीसाठी ती बाहेर गेली. खरेदी झाल्यानंतर तिला अस्वस्थ वाटू लागलं. त्यानंतर स्पंदनाला हृदयविकाराचा झटका आला. लगेचच तिला रुग्णालयामध्ये भरती करण्यात आलं. मात्र स्पंदनाला डॉक्टरांनी मृत घोषित केलं. या घटनेमुळे संपूर्ण कुटुंबावर दुःखाचा डोंगर कोसळला आहे.
बुधवारी (९ ऑगस्ट) स्पंदनाच्या पार्थिवावर अंत्यसंस्कार करण्यात आले. यावेळी बरेच दाक्षिणात्य कलाकार स्पंदनाच्या अंतिम संस्कारासाठी पोहोचले होते. यादरम्यानचे अनेक व्हिडीओ सोशल मीडियावर व्हायरल झाले आहेत. यामधीलच राघवेंद्रचा एक व्हिडीओ डोळ्यात पाणी आणणारा आहे. पत्नीला अखेरचा निरोप देताना राघवेंद्र ढसाढसा रडत होता.
Vijay Raghavendra, devastated by the loss of his wife, has been receiving solace from his close friends.#VijayaRaghavendra #SpandanaVijayRaghavendra #Spandana #spandanafuneral #Bengaluru #malleshwaram pic.twitter.com/qVqtc7QXIk
— Madhuri Adnal (@madhuriadnal) August 9, 2023
एका व्हिडीओमध्ये राघवेंद्र खुर्चीवर बसून एकटक पत्नीच्या पार्थिवाकडे बघताना दिसत आहे. तर दुसऱ्या व्हिडीओमध्ये त्याचे कुटुंबियांनाही अश्रू अनावर झाले असल्याचं पाहायला मिळत आहे. सुप्रसिद्ध अभिनेता यशही स्पंदनाला श्रद्धांजली वाहण्यासाठी आला होता. यादरम्यान राघवेंद्र त्याला मिठी मारुन रडताना दिसला. पत्नीच्या अचानक जाण्याने तो पूर्णपणे कोलमडून गेला आहे.
‘अपूर्वा’ या चित्रपटामध्ये स्पंदनाने पाहुणा कलाकाराची भूमिका साकारली होती. याच महिन्यामध्ये राघवेंद्र व स्पंदना लग्नाचा १६वा वाढदिवस साजरा करणार होते. २००७मध्ये राघवेंद्र व स्पंदना विवाहबंधनात अडकले. या दोघांना एक मुलगाही आहे. शौर्य असं या मुलाचं नाव आहे. पत्नीच्या निधनानंतर राघवेंद्रही पूर्ण खचून गेला आहे.
