Suraj chavan Wedding : ‘बिग बॉस मराठी’ फेम अभिनेता सूरज चव्हाणच्या लग्नाची धामधूम पाहायला मिळाली. सोशल मीडियावर त्याच्या लग्नाचे फोटो, व्हिडीओ तुफान व्हायरल होताना पाहायला मिळाले. २९ नोव्हेंबरला सूरज चव्हाणचा लग्नसोहळा थाटामाटात पार पडला. त्याच्या लग्नाचे अनेक व्हिडीओ व्हायरल झाले. यांत सूरजच्या लग्नासाठी तोबा गर्दी पाहायला मिळाली. इतकंच नाहीतर सूरजच्या लग्नाला अनेक सेलिब्रिटी आणि सोशल मीडिया इन्फ्लुएन्सर उपस्थित होते. ‘बिग बॉस’ फेम जान्हवी किल्लेकर सूरजच्या लग्नात भलताच भाव खाऊन गेली. मात्र यावेळी सूरजची ‘बिग बॉस’ पासून झालेली बहीण अंकिता वालावलकर काही दिसली नाही. त्यामुळे सूरजच्या लग्नात अंकिताला अनेकांनी मिस केलं.
सूरजची लगीनघाई सुरु होती तेव्हा अंकिता त्याच्या शॉपिंगच्या वेळी त्याच्याबरोबर होती. मात्र, लग्नाला ती जाऊ शकली नाही. आणि याबाबत तिने आधीच एका व्हिडीओमध्ये सांगितलं होतं. असं असलं तरी सूरज व संजनावर अक्षता पडताच त्यांचा लग्नाचा फोटो सोशल मीडियावर पोस्ट करत अंकिताने दोघांनाही शुभेच्छा दिल्या. लाडक्या भावाच्या लग्नासाठी अंकिताने खास पोस्ट शेअर केली.
अंकिताने सूरज संजनाचा लग्नातील व्हिडीओ शेअर करत, “प्रिय सूरज आणि संजना… आज तुम्ही एकत्र हातात हात घालून नव्या वाटेवर पाऊल ठेवत आहात. या वाटेवर कधी उजेड असेल, कधी अंधार, कधी सावल्या; पण एकमेकांचा आधार, माया आणि एकमेकांची सोबत – असेल तर प्रत्येक अडचण सहज पार करता येते. जीवनात कितीही बदल झाले तरी एकमेकांसाठीचा आदर, आपुलकी आणि जिव्हाळा कायम ठेवा. छोट्या-छोट्या क्षणांत आनंद शोधा, एकमेकांच्या हसण्यात जग जिंका आणि एकमेकांच्या डोळ्यांतील विश्वास कधीही कमी होऊ देऊ नका. नांदा सौख्यभरे! तुमच्या नवविवाहित जीवनाला मनःपूर्वक, हार्दिक आणि मंगलमय शुभेच्छा! – अंकिता आणि कुणाल!”, असं म्हटलं.
आणखी वाचा – सूरज चव्हाणला लागली हळद, आई-वडिलांच्या फोटोला नमस्कार करुन केली सुरुवात; घरीच कुटुंबियांसह सेलिब्रेशन
सूरज-संजना आता अखेर लग्नबंधनात अडकले आहेत. दोघांचा प्रेमविवाह आहे. संजना त्याच्या चुलत मामाची मुलगी आहे. दोघांच्या लग्नाला चाहत्यांची प्रचंड गर्दी पाहायला मिळाली. लग्नानंतरचे विधी संपवून आता सूरज देवदर्शनाला पोहोचला आहे.
