गेल्या अनेक दिवसांपासून मराठी कलाविश्वातील एक जोडी खूपच चर्चेत आहे आणि ही जोडी म्हणजे गायिका मुग्धा वैशंपायन व गायक प्रथमेश लघाटे. गेले काही दिवस ही जोडी त्यांच्या लग्नामुळे चांगलीच चर्चेत आहे. सोशल मीडियावर गेले काही दिवस ते त्यांच्या लग्नाआधीच्या विधींचे अनेक फोटो व व्हिडीओ शेअर करत होते. हळदी, ग्रहमखचे काही खास क्षण त्यांनी चाहत्यांवरोबर शेअर केले होते. अशातच ही जोडी काल (२१ डिसेंबर) रोजी विवाहबंधनात अडकली. ‘सारेगमप लिटिल चॅम्प्स’ या लोकप्रिय कार्यक्रमामधून स्पर्धक म्हणून सुरू झालेला त्यांचा हा प्रवास अखेर एकेमकांचे जोडीदार होण्यापर्यंत पार पडला. अशातच त्यांच्या लग्नाला या शोमधील इतर स्पर्धक व त्यांच्या मित्रपरिवारानेदेखील हजेरी लावली होती. (Juilee Joglekar And Rohit Raut On Instagram)
गायक रोहित राऊत व गायिका जुईली जोगळेकर यांनी मुग्धा-प्रथमेश यांच्या लग्नाला खास उपस्थिती लावली होती. ‘सारेगमप’मधील कलाकारांच्या उपस्थितीमुळे या लग्नाला आणखीणच रंगत आली. रोहित-जुईली यांच्याबरोबरच गायिका शमिका भिडे, कार्तिकी गायकवाड व अवंती पटेल यांनीही खास हजेरी लावली होती. कार्तिकी, रोहित, जुईली व शमिका हे मुग्धा व प्रथमेश हे ‘सारेगमप’ कार्यक्रमापासून एकमेकांबरोबर आहेत. या कार्यक्रमानंतर त्यांनी एकत्र अनेक कार्यक्रमदेखील केले आहेत. त्यामुळे त्यांच्यातील ही मैत्री अगदी खास आहे.
मुग्धा-प्रथमेश यांच्या लग्नात रोहित-जुईली यांनी खूपच धमाल केल्याचे पाहायला मिळाले. त्यांच्या लग्नात रोहितने पिवळ्या रंगाचा कुर्ता व पांढऱ्या रंगाचा पायजमा परिधान केला होता. तर जुईलीने जांभळ्या रंगाची साडी परिधान केली होती. त्यांच्या लग्नानिमित्त रोहित-जुईलीने खूपच मज्जा-मस्ती केल्याचे पाहायला मिळाले. जुईलीने शेअर केलेल्या एका व्हिडीओमध्ये मुग्धा-प्रथमेश यांची खास रांगोळी काढण्यात आल्याचेदेखील पहायला मिळाले
दरम्यान, मुग्धा-प्रथमेशच्या लग्नानंतर त्यांचे अनेक फोटो व व्हिडीओ सोशल मीडियावर व्हायरल झाले. यावेळी लग्नात मुग्धाने पिवळ्या रंगाची नऊवारी साडी परिधान केली असून त्यावर साजेसे दागिने परिधान केले होते. तर प्रथमेशने लाल रंगाचा धोतर, सदरा, त्यावर पिवळ्या रंगाचा शेला व डोक्यावर पगडी असलेला पेशवाई लूक केला होता. मुग्धा-प्रथमेश यांच्या लग्नातील या खास पारंपरिक लूकने चाहत्यांचे लक्ष वेधून घेतले.