सध्या सिनेसृष्टीत लग्नाचे वारे वाहत असताना एकामागोमाग एक कलाकार मंडळी लग्नबंधनात अडकत आहेत. अशातच हिंदी सिनेसृष्टीतील एक लोकप्रिय जोडीदेखील नुकतीच बोहोल्यावर चढली आहे. ‘इस प्यार को क्या नाम दूं’, ‘इश्कबाज’ फेम अभिनेत्री श्रेनू पारीख हिचा नुकताच विवाहसोहळा उरकला आहे. श्रेनूने २१ डिसेंबर २०२३ रोजी लगीनगाठ बांधली आहे. श्रेणूने मराठमोळ्या अक्षय म्हात्रेबरोबर लग्न केले. (shrenu parikh and akshay mhatre wedding)
श्रेनूच्या लग्नसोहळ्यातील अनेक फोटो, व्हिडीओ सोशल मीडियावर वाऱ्यासारखे पसरले आहेत. दोघांनीही त्यांच्या इन्स्टाग्राम अकाउंटवरुन लग्नाचे सुंदर फोटो शेअर केले आहेत. तसेच सोशल मीडियावर देखील त्यांच्या लग्नाची सुंदर झलक पाहायला मिळत आहे. अगदी शाही थाटामाटात श्रेनू व अक्षय यांनी त्यांचा लग्नसोहळा पार पाडला.
इन्स्टाग्रामवर व्हायरल झालेल्या व्हिडीओमध्ये श्रेनू पारीखच्या लूकने साऱ्यांचं लक्ष वेधून घेतलं. लग्नमंडपात येताना श्रेनू भावुक झालेलीही पाहायला मिळाली. यावेळी अभिनेत्रीच्या नऊवारी साडीने साऱ्यांचं लक्ष वेधून घेतलं. शिवाय अभिनेत्रीने केलेला मराठमोळा लूक विशेष भावला. नववधूच्या नाकात नथ व पारंपरिक दागिन्यांनी साऱ्यांना भुरळ घातली. तर दुसऱ्या व्हिडीओमध्ये अक्षय म्हात्रेची एंट्री पाहायला मिळाली. अक्षयने पांढर्या फुलांनी सजवलेल्या कारमधून एंट्री घेतली. एंट्रीदरम्यान अक्षय राजबिंडा दिसत होता. ‘बचना ए हसीनो’ या गाण्यावर डान्स करत तो आपल्या नवरीला घ्यायला आला. लग्नातील पाहुणे वराबरोबर मनसोक्त नाचताना दिसले.
लग्नासाठी श्रेनू व अक्षयने सुंदर पारंपरिक कपडे परिधान केले होते.श्रेनूने लाल-केशरी दुहेरी रंगाचा लेहेंगा परिधान केला होता, तर दुसरीकडे अक्षय लाल रंगाच्या शेरवानीमध्ये खूपच हँडसम दिसत होता. श्रेणू व अक्षय यांची भेट २०२१मध्ये ‘घर एक मंदिर’ मालिकेच्या सेटवर झाली. सुरुवातीला त्यांच्यात मैत्री झाली आणि त्यानंतर या मैत्रीचं रूपांतर प्रेमात झालं.
