अभिनेत्री श्रुती हासनने साऊथ सिनेसृष्टीपासून ते बॉलिवूडपर्यंत आपल्या अभिनय कौशल्याने प्रेक्षकांच्या मनावर राज्य केलं. तर श्रुती अभिनयशिवाय बरेचदा तिच्या वैयक्तिक आयुष्यामुळे चर्चेत असते. अभिनेत्री कित्येकदा तिच्या लव्ह लाईफमुळे चर्चेत आलेली दिसली. मात्र आता श्रुती तिच्या वैयक्तिक आयुष्यात काहीच बरोबर चालत नसल्याने चर्चेत आली आहे. मीडिया रिपोर्ट्सनुसार, अभिनेत्रीने तिचा बॉयफ्रेंड शंतनू हजारिकाबरोबर ब्रेकअप केले आहे. (Shruti Haasan Breakup News)
हिंदुस्तान टाइम्सच्या वृत्तानुसार, श्रुती हसन व तिचा प्रियकर शंतनू हजारिका यांनी त्यांचे अनेक वर्षांपासून असलेलं नातं तोडलं आहे आणि आता ते वेगळे झाले आहेत. दोघांनीही सोशल मीडियावर एकमेकांना अनफॉलो केलं असल्याचंही समोर आलं. रिपोर्टनुसार, श्रुती व शंतनू यांच्यात काही वैयक्तिक समस्या होत्या ज्यानंतर त्यांनी ब्रेकअप करण्याचा निर्णय घेतला. मात्र, दोघांनीही यावर अद्याप कोणतीही प्रतिक्रिया दिलेली नाही. श्रुतीने अलीकडेच तिच्या इन्स्टाग्राम अकाऊंटवरून एक पोस्ट शेअर केली आहे ज्यामध्ये तिने लिहिले आहे की, “हा एक विलक्षण प्रवास आहे, माझ्याबद्दल व लोकांबद्दल मी खूप काही शिकत आहे”.
श्रुती व शंतनू खूप दिवसांपासून एकमेकांना डेट करत होते आणि गेल्या काही वर्षांपासून ते लिव्हइन रिलेशनशिपमध्येही होते. अनेकदा दोघेही एकत्र दिसले आणि त्यावेळी एकमेकांवर प्रेमाचा वर्षाव करण्याची एकही संधी सोडली नाही. श्रुती एक अभिनेत्री आहे तर शंतनू एक प्रसिद्ध डूडल व कलाकार आहे. रफ्तार, दिव्य, ऋत्विजसह त्यांनी अनेक लोकप्रिय व्यक्तींबरोबर काम केले आहे.
या वर्षाच्या सुरुवातीला, सोशल मीडिया सेन्सेशन ओरी उर्फ ओरहान अवत्रमणीने शंतनूच्या लग्नाची अफवा पसरवली होती की तो श्रुतीचा पती आहे. तथापि, नंतर श्रुतीने इन्स्टा स्टोरीवर एक पोस्ट शेअर करुन स्पष्ट केले की, “प्रत्येक गोष्टीबद्दल मी खुलेपणाने बोलते मग मी हे का लपवू?, मी विवाहित नाही”. श्रुतीच्या कामाबद्दल बोलायचे झाले तर, श्रुती शेवटची ‘सालार’मध्ये दिसली होती. या चित्रपटात प्रभास व पृथ्वीराज सुकुमारन यांच्या मुख्य भूमिका होत्या आणि चित्रपटाला खूप पसंती मिळाली होती. ‘सालार’ने जगभरातील बॉक्स ऑफिसवर ७०० कोटींहून अधिक कमाई केली होती.