‘झेंडा’, ‘मोरया’, ‘शाळा’, ‘बॉईज’ यांसारख्या अनेक लोकप्रिय चित्रपटांतून अभिनय करत प्रेक्षकांच्या मनावर अधिराज्य करणारा अभिनेता म्हणजे संतोष जुवेकर. आजवर अनेक चित्रपटांतून नानाविध भूमिका साकारत त्याने प्रेक्षकांचे मनोरंजन केलं आहे. अभिनयाव्यतिरिक्त संतोष हा सोशल मीडियावरदेखील तितकाच सक्रिय असतो. सोशल मीडियावर तो त्याच्या कामाबद्दलची माहिती देत असतो. त्याचबरोबर कुशल बद्रिके व अभिजीत चव्हाण यांच्याबरोबरचे धम्माल व्हिडीओही तो सोशल मीडियाच्या माध्यमातून शेअर करत असतो आणि त्याच्या या व्हिडीओला चाहत्यांकडूनही चांगला प्रतिसाद मिळतो.
अशातच संतोषने नुकताच शेअर केलेला एक व्हिडीओ सध्या सर्वांचे लक्ष वेधून घेत आहे. अभिनेता लवकरच दिग्दर्शक लक्ष्मण उतेकर यांच्या ‘छावा’ चित्रपटातून चाहत्यांच्या भेटीला येत आहे. याच चित्रपटाचे शूटिंग आता संपले असून याबद्दलची एक खास पोस्ट शेअर केली आहे. संतोषने बॉलिवूड अभिनेता विकी कौशलबरोबरचा मजामस्ती करतानाचा व्हिडीओ शेअर करत एक पोस्ट लिहिली आहे.
संतोषने हा खास व्हिडीओ शेअर करत असं म्हटलं आहे की, “शेवटी माझं शूट संपल. पण शूटिंगचे हे दिवस आठवणीत राहतील. कारण उत्तम कलाकारांची आणि टीमची साथ असेल, तर काम बहारदार रंगतं आणि त्यामुळे त्या कामात मनही रमतं. या व्हिडीओमधून तुम्हाला (प्रेक्षकांना) आम्ही सेटवर केलेल्या मस्तीची कल्पना येईल, पण मला खात्री आहे चित्रपटाचा पहिला ट्रेलर येईल तेव्हा आम्ही काम करताना काय मेहनत केली आहे याचीसुद्धा तुम्हाला कल्पना येईल”.
यापुढे त्याने असं म्हटलं आहे की, “आम्ही कलाकार जेव्हा एखादं नवीन काम करतो तेव्हा नवीन माणसांची व नवीन मित्रांची ओळख होते आणि एक नवीन कुटुंब तयार होत असतं. आमच्या आयुष्यात आणि आपल्या माणसांचे आभार मानायचे नसतात. म्हणून माझ्या या कुटुंबातील प्रत्येक व्यक्तीला माझं खूप खूप प्रेम. तुम्ही सगळ्यांनी खूप मोलाची साथ दिलीत” तसेच यापुढे संतोषने दिग्दर्शक लक्ष्मण उतेकर आणि त्याच्या संपूर्ण डिरेक्शन टीमचा त्याचबरोबर विकी कौशलचं उल्लेख करत “सगळ्यांना खुप खुप प्रेम” असंही म्हटलं आहे.
आणखी वाचा – Video : “ठाण्याचे असतील तलाव फेमस पण नाशिकची नदी…”, चेतन वडनेरेचा बायकोसाठी खास उखाणा, मंडपातील व्हिडीओ समोर
यापुढे त्याने “आपण सर्वांनी केलेल्या आपल्या मेहनतीला आई भवानीचा, छत्रपती शिवाजी महाराजांचा, छत्रपती संभाजी महाराजांचा आणि मायबाप रसिकांचा आशीर्वाद लाभुदे हीच इच्छा व प्रार्थना” असं म्हटलं आहे. दरम्यान, या व्हिडीओला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. एकच वादा, संतोष दादा., कमाल, वा दादा, जबरदस्त” अशा अनेक कमेंट्स करत या व्हिडीओला प्रतिसाद दिला आहे.
