मराठी मनोरंजन विश्वात ‘झी गौरव पुरस्कार’ हे कलाकारांसाठी कायमच विशेष राहिले आहेत. मराठी मनोरंजन सृष्टीत काम करत प्रेक्षकांचे मनोरंजन करणाऱ्या कलाकारांच्या कौतुकास्पद कामगिरीसाठी हा पुरस्कार दिला जातो. या पुरस्कार सोहळ्याचे ‘झी चित्र गौरव’ व ‘झी नाट्य गौरव’ अशा दोन स्वरुपांमध्ये हे पुरस्कार दिले जातात. ‘झी चित्र गौरव’ पुरस्कारामध्ये ‘मराठी पाऊल पडते पुढे’ हा एक मानाचा पुरस्कारही दिला जातो.
मराठीसह इतर भाषांत व माध्यमांत काम करत प्रेक्षकांचे मनोरंजन करणाऱ्याला कलाकाराला हा विशेष पुरस्कार देऊन गौरविण्यात येते. अशातच यंदाच्या वर्षी, ‘मराठी पाऊल पडते पुढे’ या पुरस्कारावर अभिनेत्री प्रिया बापटने आपले नाव कोरलं आहे. मराठीसह बॉलीवूडमध्ये स्वत:ची वेगळी ओळख निर्माण केलेल्या प्रिया बापटला यंदाचा ‘मराठी पाऊल पडते पुढे’ पुरस्कार देण्यात आला.
हा विशेष पुरस्कार मिळताच अभिनेत्रीने तिच्या भावना व्यक्त केल्या आहेत. प्रियाने एक पोस्ट शेअर करत तिच्या आनंदी भावना व्यक्त केल्या आहेत. यावेळी तिने असं म्हटलं की, “आपल्या यशाचं कौतुक होत, पण तिथपर्यंत पोहोचण्याच्या प्रवासाला शाबासकी मिळणं हे जास्त खास आहे. आपल्या कष्टांची, मेहनतीची दखल घेउन त्यातून मिळवलेल्या यशाबद्दल उभ्या महाराष्ट्राला अभिमान वाटणं हे खूप मानाचं आहे. आज ‘मराठी पाउल पडते पुढे’ हा पुरस्कार स्विकारकाना मन भरून आलं. अभिनेत्री म्हणून माझ्या आजपर्यंतच्या प्रवासातले सगळे दिग्दर्शक, निर्माते, सहकलाकार या सर्वांना खूप खूप धन्यवाद”.
यापुढे प्रियाने तिच्या आयुष्यातील महत्वाच्या व्यक्तींचे आभार मानत असे म्हटले आहे की, “मोठी झेप घेऊ पाहणाऱ्या, माझ्या पंखांना बळ देणाऱ्या आई-वडिलांना नमस्कार. माझ्या अभिनय क्षमतेवर विश्वास दाखवून मला नवं आकाश खुलं करून देणाऱ्या नागेश कुकनूर यांना मनःपूर्वक धन्यवाद. श्वेता तुला खूप खूप प्रेम. मुकुंद मेन्शन हा माझं कुटुंब आहे व कायम राहील आणि माझ्याबरोबर, माझ्यावर पूर्ण विश्वास ठेवून मनापासून प्रेम करणारा ऊमेश तुलाही खूप खूप प्रेम आणि धन्यवाद!”
प्रियाच्या या पोस्टवर तिच्या चाहत्यांसह मराठी मनोरंजन विश्वातील अनेक कलाकारांनी लाईक्स व कमेंट्सद्वारे चांगलाच प्रतिसाद दिला आहे. तसेच तिला शुभेच्छादेखील दिल्या आहेत. अमृता खानविलकर, राहुल देशपांडे, आरती मोरे, पल्लवी पाटील, सलील कुलकर्णी, क्षितिज पटवर्धन, पूर्वा कौशिक, अभय महाजन, नंदिता पाटकर, सिद्धार्थ मेनन, यांसह अनेकांनी कमेंट्सद्वारे तिचे अभिनंदन केलं आहे.
