छोट्या पडद्यावरील ‘महाराष्ट्राची हास्यजत्रा’ हा घराघरात पहिला जाणारा लोकप्रिय कार्यक्रमांपैकी एक. हास्यजत्रातील कलाकारांनी प्रेक्षकांच्या मनावर अधिराज्य केलं असून यांमुळे अनेक कलाकार आज लोकप्रियतेच्या शिखरावर पोहोचली आहे. याच कार्यक्रमामुळे प्रसिद्ध झालेला कलाकार म्हणजेच प्रसाद खांडेकर. एकांकिकेतून अभिनय क्षेत्रात पदार्पण करणाऱ्या प्रसादने हास्यजत्रेसह अनेक नाटक, मालिकांमध्ये काम केलेलं असून अभिनयाबरोबर त्याने अनेक नाटकांचे दिग्दर्शनदेखील केले आहे. नाटकांचे दिग्दर्शन केल्यानंट तो चित्रपटांच्या दिग्दर्शनाकडे वळला आहे. (Swapnil Joshi On Instagram)
प्रसाद खांडेकर दिग्दर्शित ‘एकदा येऊन तर बघा’ हा चित्रपट गेल्या महिन्यात प्रदर्शित झाला होता. या चित्रपटाला प्रेक्षकांनी चांगलाच प्रतिसाद दिल्याचे पाहायला मिळाले होते. या चित्रपटाचे लेखन व दिग्दर्शन स्वत: प्रसादनेच केले होते. तर अभिनेते सयाजी शिंदे, गिरीश कुलकर्णी, पंढरीनाथ कांबळे, विशाखा सुभेदार, तेजस्विनी पंडित, नम्रता संभेराव, भाऊ कदम, ओंकार भोजने, रोहित माने, वनिता खरात अशी तगडी स्टारकास्ट या चित्रपटात पाहायला मिळाली होती. अशातच आता प्रसाद दिग्दर्शक म्हणून त्याचा आगामी चित्रपट घेऊन येत आहे. अभिनेता स्वप्नील जोशने त्याच्या सोशल मीडियाद्वारे प्रसादच्या या आगामी चित्रपटाबद्दल माहिती दिली आहे.
स्वप्नीलने त्याच्या इन्स्टाग्राम अकाऊंटद्वारे एक व्हिडीओ शेअर केला आहे, ज्यात एकामागोमाग एक कलाकार येत असल्याचे या व्हिडीओमध्ये दिसत आहे. स्वप्नील जोशी, प्रार्थना बेहेरे, प्राजक्ता माळी, प्रसाद खांडेकर, नम्रता संभेराव, वनिता खरात, रोहित माने, ओंकार राऊत, निखील रत्नपारखी, प्रियदर्शिनी इंदलकर, सचिन गोस्वामी, चेतना भट, प्रभाकर मोरे, ऐश्वर्या बडदे, श्याम राजपूत, निखिल बने, प्रमोद बनसोडे व श्लोक प्रसाद खांडेकर आदि कलाकारांची फौज या चित्रपटात पाहायला मिळणार आहे. स्वप्नीलने हा खास व्हिडीओ शेअर करत “तर हा व्हिडीओ बनवायचं कारण म्हणजे.. आता आम्ही काय सांगणार ना, हा व्हिडीओ बघा म्हणजे तुम्हाला कारण समजेल” असं म्हटलं आहे. नवीन मराठी चित्रपट, शूटिंगला सुरुवात असे हॅशटॅगदेखील लिहिले आहेत.
आणखी वाचा – आमिर खानचा होणारा मराठमोळा जावई आहे तरी कोण?, करतो ‘हे’ काम, बड्या सेलिब्रिटींशी खास नातं अन्…
या चित्रपटाचे लेखन हास्यजत्रेमधीलच आणखी एक लेखक प्रथमेश शिवलकरने केले आहे. तर प्रसादनेही या चित्रपटाचे लेखन व दिग्दर्शन केले आहे. दरम्यान, या व्हिडीओखाली तेजस्विनी पंडित, समिधा गुरु, नंदिता पाटकर यांसह अनेक कलाकारांनी कमेंट्सद्वारे शुभेच्छा दिल्या आहेत. त्याचबरोबर अनेक चाहत्यांनीसुद्धा या व्हिडीओखाली कमेंट्स करत या नवीन चित्रपटाविषयी उत्सुकता व्यक्त केली आहे. तसेच या चित्रपटासाठी शुभेच्छादेखील दिल्या आहेत. .