पंतप्रधान नरेंद्र मोदी यांच्या हस्ते गुरुवारी दिल्ली येथे ‘भारत मंडपम’मध्ये ‘नॅशनल क्रिएटर्स पुरस्कार’ सोहळा आयोजित करण्यात आला होता. यामध्ये देशातील युवा व आंतरराष्ट्रीय कंटेन्ट क्रिएटर्सना वेगवेगळ्या श्रेणीमध्ये पुरस्कार देऊन गौरविण्यात आले. यामध्ये प्रसिद्ध पॉडकास्टर रणवीर अल्लाहबादिया, जया किशोरी, गायिका मैथिली ठाकूर, ‘ट्रिगर्ड इंसान’ म्हणजे निश्चय मल्हान यांना गौरविण्यात आले आहे. या कार्यक्रमामध्ये एकूण २३ क्रिएटर्सना पुरस्कार दिला आहे. भारतामध्ये अशा प्रकारचा कार्यक्रम पहिल्यांदाच आयोजित केला गेला आहे. (National Creators Awards)
या आयोजित केलेल्या पुरस्कार सोहळ्यामध्ये पंतप्रधान मोदी यांनी विजेत्यांना पुरस्कार देऊन सन्मानित केले. यावेळी पंतप्रधान मोदी यांनी मैथिलीला गाणे गाण्याची विनंती केली. मोदी म्हणाले की, “आज मला तुम्ही काहीतरी ऐकवा. कारण लोकं माझं ऐकून थकले आहेत”. त्यानंतर मैथिलीने शिवरात्रीच्या निमित्ताने शिव भजन गायले. तिच्या गाण्यामुळे सर्व प्रेक्षक मंत्रमुग्ध झाले होते.
तसेच ‘ट्रिगर्ड इंसान’ला अवॉर्ड देताना पंतप्रधान मोदी म्हणाले की, “काहीतरी असं सांगा ज्यामुळे ट्रिगर होईल”. निश्चयला गेमिंग क्षेत्रातील क्रिएटीव्हिटीसाठी गौरविण्यात आले. पुरस्कार मिळाल्यानंतर निश्चय म्हणाला की, “ पीएम सर या पुरस्कारासाठी धन्यवाद . मी खूप अस्वस्थ आहे. मी काहीही विचार करुन आलो नव्हतो. मला माहीत नव्हतं की मला काही बोलावं लागेल. पण मी इथे येऊन बघितले की सर्वजण काही न काही बोलत आहेत तेव्हा मी फोनमध्ये काय बोलायचं ही बघू लागलो, विचार करू लागलो. पण समजत नाही आहे की नक्की काय बोलू. पण मी एक सांगेन की देशाने आता गेमिंग क्षेत्रालाही स्वीकारले आहे आणि मला या श्रेणीमध्ये पुरस्कार दिला त्यासाठी खूप धन्यवाद.
याव्यतिरिक्त अजूनही काही क्रिएटर्सना गौरविण्यात आले. यामध्ये ग्रीन चॅम्पियन श्रेणीमध्ये पंखती पांडे, उत्तम कथाकार कार्तिका गोविंदासामी, टेक श्रेणीमध्ये गौरव चौधरी यांचाही सन्मान केला. ‘ट्रिगर्ड इंसान’ला ‘सेलिब्रिटी क्रिएटर ऑफ द इयर अवॉर्ड’दिला गेला. विजेत्यांचे पंतप्रधान मोदी यांनी खूप कौतुक केले आणि पुढील वाटचालीसाठी शुभेच्छाही दिल्या.