अयोध्यातील बहुप्रतीक्षित ऐतिहासिक श्री राम मंदिर अवघ्या काही दिवसांत भक्तांसाठी खुले होणार आहे. या भव्य दिवसाची सारे भक्त आतुरतेने वाट पाहत आहेत. हा सोहळा २२ जानेवारी २०२४ रोजी मोठ्या जल्लोषात संपन्न होणार आहे. मंदिर परिसरात राम लल्लाच्या मुर्तीच्या प्राण प्रतिष्ठेच्या भव्य समारंभाला माननीय पंतप्रधान नरेंद्र मोदी उपस्थित राहणार आहेत. संपूर्ण भारतवासीय या दिवसाच्या प्रतीक्षेत आहेत. अशातच रामभक्तीच्या या सोहळ्याला चारचाँद लावण्यासाठी एका रामभक्तीच्या गीताने साऱ्यांच्या मनावर राज्य केलं आहे. (Arya Ambekar Emotional Post)
रामभक्तीवर आधारित असलेलं हे ‘जयश्रीराम भजन’ साऱ्या रसिकांच्या मनावर राज्य करत आहे. गायक सुरेश वाडकर व गायिका आर्या आंबेकर हिने स्वरबद्ध केलेलं हे गाणं सारेच गुणगुणू लागले आहेत. या गाण्याची स्तुतीपर पोस्ट भारताचे पंतप्रधान नरेंद्र मोदी यांनी त्यांच्या सोशल मीडियावरुन शेअर केली. ही पोस्ट शेअर करत त्यांनी सुरेश वाडकर व आर्या आंबेकर या दोघांचंही भरभरुन कौतुक केलं. नरेंद्र मोदी यांनी ही पोस्ट शेअर करत, “अयोध्येत होणाऱ्या प्राणप्रतिष्ठा संदर्भात संपूर्ण देश भगवान श्रीरामाच्या भक्तीच्या रंगात रंगला आहे. सुरेश वाडकर व आर्या आंबेकर यांनी त्यांच्या मधुर सुरांमध्ये ही भावना व्यक्त केली आहे” असं कॅप्शन देत या भक्तिमय गाण्याची लिंक शेअर केली आहे.
यावर आर्या आंबेकर हिने भावुक पोस्ट शेअर केलेली पाहायला मिळत आहे. आर्याने नरेंद्र मोदी यांची पोस्ट शेअर करत त्याखाली कॅप्शन देत, “माननीयांचे निस्सीम प्रशंसक म्हणून. पंतप्रधान मोदीजी व त्यांचे कार्य. या पोस्टने मला फक्त अश्रू अनावर झाले. असा पराकोटीचा आनंद कधीच अनुभवला नव्हता. फक्त शब्दात मांडता येत नाही. आमचा हा खारीचा वाटा, ही सांगीतिक सेवा श्रीराम चरणी रुजू झाली. प्रत्यक्ष श्रीरामाचा आशीर्वाद जणू आमच्या पर्यंत पोचला, अशी भावना मनात निर्माण झाली” असंही म्हटलं आहे.
आणखी वाचा – बायकोसाठी बनला शेफ, गौतमी देशपांडेचे लाड पुरवतोय स्वानंद तेंडुलकर, खास पदार्थ अन्…
यापुढे त्यांनी, “प्रिय मोदीजी, २२ जानेवारीला मोठा दिवस साजरा करण्यासाठी आमच्या छोट्याशा योगदानाची दखल घेतल्याबद्दल मनःपूर्वक आभार. खरेच, यापेक्षा मोठे कोणतेही प्रोत्साहन असू शकत नाही. तुमच्या पावलांवर पाऊल ठेवण्याचा, संगीताच्या माध्यमातून, माझ्या स्वतःच्या मार्गाने देशसेवा करण्याचा सदैव प्रयत्न करेन. अत्यंत आदराने नतमस्तक होऊन तुमच्या चरणांना स्पर्श करुन तुमचे आशीर्वाद मागत आहेत” असंही म्हटलं.