‘झी मराठी’ वाहिनीवरील ‘पारू’ या मालिकेला प्रेक्षक भरभरुन प्रतिसाद देताना दिसत आहेत. अल्पावधीतच या मालिकेला प्रेक्षकांनी पसंती दिली आहे. या मालिकेतील कथानकाच्या जोरावर व मालिकेत येणाऱ्या रंजक वळणामुळे ही मालिका अव्वल स्थानावर आहे. या मालिकेत पारूचा संघर्ष पाहायला मिळत आहे. पारू व आदित्य यांच्यातील मैत्रीपूर्व नातं साऱ्यांच्या पसंतीस पडत आहे. मालिकेत पारूची भूमिका अभिनेत्री शरयू सोनावणे साकारत आहे. तर आदित्यच्या भूमिकेत प्रसाद जवादेला पाहणं रंजक ठरतंय. पारू व आदित्यची जोडी लोकप्रिय जोडींपैकी एक आहे. (Paaru Serial Promo)
मालिकेत सध्या पारूवरील संकट टळलेलं पाहायला मिळालं. आदित्य सुखरूप पारूला घरी घेऊन येतो. हॉस्पिटलमध्ये असतानाही आदित्य पारुसाठी बरीच धावपळ करताना दिसतो. घरी आल्यानंतरही तो पारूची विशेष काळजी घेत असतो. ही गोष्ट दामिनी व दिशाला दिसताच त्यांनाही खटकते. तर एकीकडे आदित्य पारूचा विचार करत असतो. पारूच्या विचारात असलेल्या आदित्यला कळतंच नाही की तो पारूचा इतका विचार का करत आहे. एकूणच मालिकेत आता लवकरच दोघांचा प्रेमाचा ट्रॅक सुरु होणार असल्याची शक्यता दिसत आहे.
पारू मालिकेच्या नुकत्याच समोर आलेल्या प्रोमोने साऱ्यांचं लक्ष वेधून घेतलं आहे. या प्रोमोमध्ये, आदित्य लोगोसाठी डोळे शोधत असतो. तो लोगोसाठी अगदी योग्य अशा डोळ्यांची निवड करण्यासाठी सांगतो. तेव्हा त्याला पारूचे डोळे दिसतात. आणि तितक्यात पारू स्वतःही त्याच्या समोर येते. तेव्हा आदित्य पारूकडे पाहतच राहतो. हे डोळे पहा, सतत काहीतरी बोलतायत. असं वाटत या डोळ्यांकडे बघत रहावं, असेही तो बोलताना दिसतो. प्रोमोमध्ये आदित्य हा पारूच्या डोळ्यात हरवून गेलेला असतो. पारूच्या डोळ्यांच्या तो प्रेमात पडतो.
आता किर्लोस्कर कंपनीच्या लोगोसाठी पारूच्या डोळ्यांची निवड होणार का?, आदित्य पारूच्या प्रेमात पडून किर्लोस्कर घरात स्थान मिळवणार का?, हे पाहणं रंजक ठरेल.
